Японы Оказаки хотын засаг дарга Үчида Ясухиро Байтын 360 төвд зочилно

     Монголын байтын тамирчид 2020 оны Токиогийн олимпийн өмнө,  Японы тамирчидтай тус улсад хуваарийн дагуу хамтарсан бэлтгэл хийж байгаа бөгөөд энэхүү нэн таатай боломжийг Монголчуудад олгосон Японы Оказаки хотын засаг дарга Үчида Ясухиро МБХХ-ны ерөнхийлөгч П.Цагааны урилгаар манай улсад албан ёсоор айлчилж байна. Түүнтэй хамт Оказаки хотын хэвлэл мэдээлэл, гадаад харилцаа, соёлын харилцаа хариуцсан захирал Ёшио Ота хамт ирсэн бөгөөд албаны хүмүүсийг МБХХ-ны тэргүүн дэд ерөнхийлөгч С.Эрдэнэболд, Шизүока Монголын Найрамдлын нийгэмлэгийн тэргүүн Китагава Масахиро нар угтаж авлаа. Тэрээр өнөөдөр МҮОХ-ны удирдлагуудтай уулзаж, Үндэсний цэцэрлэгт хүрээлэнд байрлах Байт харвааны 360 төвд зочилж, Байтын өсвөр үе, залуучуудын улсын аварга шалгаруулах тэмцээнийг үзэж сонирхоно. 

   Эргэн сануулахад Монголын Байт харвааны холбооны ерөнхийлөгч Пунцагийн Цагаан Япон Улсын Аичи мужийн Оказаки хотын дарга Үчидо Ясүхиротай хамтран ажиллах санамж бичигт гарын үсэг зурж, Монголын байт харвааны тамирчид 2020 оны "Токиогийн олимп"-ын наадамд оролцох бэлтгэл сургуулилтаа Оказаки хотод японы тамирчидтай хамт хийхээр болсон бөгөөд анхны бэлтгэлээ Японд амжилттай хийгээд ирсэн билээ. 

Манай улсын тамирчдын бэлтгэл хийж байгаа Оказаки хот 380 мянган оршин суугчтай бөгөөд байт харвааны сургууль, тамирчид, дасгалжуулагч, сургалтын байгууламжаараа Япон улсдаа тэргүүлдэг юм.