Таеквондо: М.Түмэнбаяр мөнгөн медаль хүртжээ

Дэлхийн оюутны спортын зуны “Универсиад” XXX наадам Италийн Наполи хотод болж байна. Монгол Улсын баг тамирчдаас таеквондогийн төрөлд эрэгтэйчүүдийн 58 кг-ын жинд М.Түмэнбаяр мөнгөн медаль хүртлээ. Тэрбээр Эстони, Франц, Азарбайжан, Италийн тамирчдыг дараалан хожиж, аваргын алтан медалийн төлөөх тоглолтод Ираны тамирчин Х.Сегхад ялагдан дэд аварга боллоо. Энэ жинд Тайланд, Италийн тамирчид хүрэл медалийн эзэд болж, Универсиадын медальтан болсон байна.

Монгол Улсаас энэ удаагийн Универсиад наадамд жүдо бөх, таеквондо, буудлага, байт харваа, усанд сэлэлт, талбайн теннис, ширээний теннис гэсэн нийт долоон төрлөөр 33 тамирчин оролцож, мөнгө, хүрэл медаль тус бүр нэгийг хүртлээ.

Энэ сарын 14-ний өдрийг хүртэл үргэлжлэн явагдах Универсиад наадамд 120 орны оюутан тамирчид спортын 15 төрөлд шилдгүүдээ тодруулсаар байна.