Л.Отгонбаатар Ази тивийн аварга боллоо

Арабын нэгдсэн Эмират улсын Фужирах хотноо жүдо бөхийн Ази, номхон далайн бүсийн аварга шалгаруулах тэмцээн үргэлжилж байгаа. 
Өчигдөр тус тэмцээний хүнд жингийн барилдаанууд явагдсан бөгөөд манай улсын тамирчдаас -90 Э.Мөнхжаргал, -100 Л.Отгонбаатар, +100 Ө.Дүүрэнбаяр, -78 О.Мөнхцэцэг С.Шүрэнчимэг, +78 Э.Гандиймаа нар барилдав.

Эдгээр бөхчүүдээс Л.Отгонбаатар финалд БНСУ-ын бөхийг ялснаар аваргын алтан медалийн эзэн боллоо. Ийнхүү Ази тивийн гурав дахь аварга төрлөө.

Азийн аварга шалгаруулах тэмцээнээс манай баг 3 алт, 2 мөнгө, 3 хүрэл медаль хүртээд байна. Маргааш багийн барилдаан болсноор тэмцээн өндөрлөнө.