2018 оны Шилдэг үнсэлтүүд

Бид өнгөрч буй оны онцлох үйл явдлуудыг танилцуулж байгаа билээ. Энэ удаад 2018 оны оддын шилдэг үнсэлтүүдийг толилуулж байна. 

Бела Хадид, The Weeknd

Өнгөрсөн жил шилдэг үнсэлтийн танилцуулгад Селена Гомес, The Weeknd хоёрын үнсэлт орж байлаа. Харин энэ удаад тэр өөр бүсгүйтэй үнсэлцээд жагсаалтад багтлаа. Шар хэвлэлийн мэдээнээс үзвэл Тhe Weeknd Бела Хадидад гэрлэх санал тавих гэж байгаа гэнэ. Тэднийг Нью-Йорк хотын гудамжаар үнсэлцэн зугаалж явахад нь папарацци нар зургийг нь авчээ.

Ханхүү Харри, Меган Маркл

Их Британийн хаан ширээ залгамжлагчдын жагсаалтын 6-д бичигдэж байгаа 34 настай ханхүү Харри Америкийн жүжигчин 37 настай Меган Маркл нарын хурим энэ жилийн гол үйл явдлуудын нэг болсон. Хуримын ёслол дээр тэд олны өмнө анх удаа үнсэлцсэн.

Хейли Болдуин, Жастин Бибер

Жастин Бибер, Хейли Болдуин хоёр гэрбүлээ батлуулснаас хойш хэнээс ч айж, эмээлгүй ил тод үнсэлцдэг болсон. 

Мила Кунис, Эштон Катчер

Тэд хамтдаа олны өмнө гараад байдаггүй тул хамт байгаа зургийг нь ч авахад хэцүү байдаг. Харин хоккейн "Вегас Голден найтс", "Лос-Анджелес кингс" багуудын тоглолтын үеэр тэд Kiss-камерт өртөөд яалт ч байхгүй үнсэлцсэн билээ. Тэдний анхны үнсэлт их дээр цагт тохиолдсон. "70-аад оны шоу" цувралын зураг авалт дээр 14 настай Мила 18 настай Эштоныг үнсэж байв.

Хайди Клум, Том Каулитц

45 настай Хайди Клум, 29 настай Том Каулитц хоёрын хайрын гал бөхөөгүй байна. Энэ жилийн Хеллоуин баяраар тэд "Шрек" хүүхэлдэйн киноны баатруудын дүрд хувилж, халуунаар үнсэлцсэн.

Жорж, Амаль Клуни

Клунигийн гэрбүл олны анхаарлыг яаж татахаа сайн мэднэ. 46 дахь удаагийн AFI Life Achievement Award шагнал гардуулах ёслол дээр хосууд үнсэлцэж, танхим тэр чигээрээ алга ташиж байлаа.

Майкл Дуглас, Кэтрин Зета-Жонс

74 настай Майкл Дуглас энэ жил л Холливудад алдрын одтой болсон билээ. Энэ ёслолын үеэр тэрбээр эхнэртээ баярлаж явдгаа хэлж, Кэтрин хариуд нь чанга гэгч нь үнссэн.

Тина Кунаки, Венсан Кассель

52 настай Венсан Кассель 21 настай Тина Кунаки нар Италийн Vanity Fair сэтгүүлийн есдүгээр сарын дугаарын нүүрийг үнсэлтээр чимсэн. Сэтгүүл гарснаас хойш удалгүй тэд үнсэлтээ хуримын бөгжөөр баталгаажуулсан. 

Женнифер Лопес, Алекс Родригес

Өнгөрсөн тавдугаар сард Нью-Йоркт болсон "Робин Гүд" сангийн буяны ажиллагааны үеэр тэд боломж гарангуут үнсэлцэж байсан юм.