Ц.Энхжин "Шилдэг 8"-д багтжээ

“Дэлхийн мисс 2017” тэмцээнд эх орноо төлөөлөн оролцож буй Ц.Энхжин спорт шалгуурын төрөлд шилдэг найман оролцогчийн нэгээр шалгарч үлджээ.

Одоогоор “Дэлхийн мисс-2017” тэмцээний “Мисс спорт” шалгуур явагдаж байгаа бөгөөд уг шалгуур нь дөрвөн төрөлтэй аж.

Хятадын Санья хотноо энэ сарын 18-ны өдөр болох дэлхийн миссийн тэмцээн “Зорилго бүхий гоо бүсгүй”, “Мисс авьяас”, “Мисс спорт”, “Мисс топ модель” болон “Мультимедиа төрөл” үндсэн таван шалгаруулалттай.

Сүүлийн жилүүдэд “Дэлхийн мисс” тэмцээний үндсэн шалгаруулалтад өөрчлөлт орсон. Үүнд “Мультимедиа” буюу олон нийтийн санал асуулгаар дүгнэх төрөл нэмэгджээ. Эхний дөрвөн төрөл оролцогчийн бэлтгэл, оролцооноос хамаарах бол сүүлчийн “Мультимедиа төрөл” эх орны эв нэгдэл, хамтын дэмжлэгээс шууд хамаарах ажээ.

Харин Монгол Улсаа төлөөлөн оролцож буй Ц.Энхжингийн хувьд дээрх шалгуурын нэг “Зорилго бүхий гоо үзэсгэлэн” шалгуурт голчлон анхаарлаа хандуулж байгааг зохион байгуулах багийнхан онцолж байсан юм.