Д.Мөнх-Эрдэнийг дахин 1 сар ЦАГДАН хорих шийдвэр гаргажээ

Иргэн Д.Мөнх-Эрдэнийг энэ сарын 12-нд сулласан. Ингэхдээ ажил гэр, эмнэлэг, хуулийн байгууллага зэрэг тодорхой газруудаас өөр газар явахыг нь хориглосон. Харин тэрбээр шүүхийн шийдвэрийг зөрчиж, заасан газруудаас өөр газар яваад байна гэх шүүмжлэлд өртөөд байсан юм.

Тэгвэл өнөөдөр түүнийг дахин нэг сар хорих шийдвэрийг шүүхээс гаргасан байна. Энэ талаар шүүхээс "Нийслэлийн прокурорын газраас яллагдагч Д.Мөнх-Эрдэнэд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.4 дэх заалтад заасан буюу “...Урьд нь авсан таслан сэргийлэх арга хэмжээг зөрчсөн...” гэх үндэслэлээр цагдан хорих таслан сэргийлэх арга хэмжээ авхуулах тухай саналыг Сүхбаатар дүүргийн Эрүүгийн хэргийн анхан шатны шүүхэд ирүүлснийг тус шүүх 2023 оны 01 дүгээр сарын 23-ны өдөр хянан хэлэлцээд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.4 дэх заалтад заасан үндэслэл тогтоогдсон тул яллагдагч Д.Мөнх-Эрдэнэд 1 сарын хугацаагаар цагдан хорих таслан сэргийлэх арга хэмжээ авч шийдвэрлэв" хэмээжээ.