Хөгжлийн банкны захирал Н.Мандуул, Төрийн банкны захирал Ө.Гантөр нар Төрийн хэмнэлтийн хууль зөрчиж, халагдах болзлоо хангалаа

   УИХ-ын дарга Г.Занданшатар “Иргэдийг хэмнэж амьдар” гэсэн утгатай үг хэлсэн нь иргэдийг бухимдуулж, “та нар өөрсдөө хэмнэ, бидэнд хэмнээд байх ч юм үлдсэнгүй” гэж уурссан иргэд залуучууд талбай дүүртэл жагссан. Иргэдийн шахалтад өртсөн Засгийн газар хэмнэлтийн хууль санаачилж, УИХ хэлэлцэн батласан.Энэ дагуу УИХ-ын харьяа байгууллагууд болон Онцгой байдал,Цагдаа, хүчний байгууллагынхнаас бусад төрийн байгууллага, төрийн өмчит газруудын дэд дарга, захирлуудыг цомхотгосон. Цомхотгохдоо өөр нэр өгч цалин хангамжийг хэвээр авч үлдэж болохгүй гэдгийг анхааруулсан. Учир нь цомхотгохоор өөр нэрээр аваад үлдчихдэг явдал гарч байсан удаатай. 

   Тухайлбал нийслэл УБ хот гэхэд орлогчуудаа төслийн удирдагч нэрээр орлогч даргатай ижил эрх мэдэл статустай байлгаж ирсэн. Тиймээс төрийн хэмнэлтийн тухай хуулийн 5.4-т “Энэ   хуульд  заасныг   зөрчиж  тэргүүн дэд, дэд, орлогч дарга, зөвлөхийн  чиг үүрэгтэй ижил эрх, үүрэг бүхий өөр нэршилтэй албан тушаалын орон тоо бий болгох, түүнд аливаа албан тушаалтныг томилох, орон тоог хэвээр хадгалахыг хориглоно” гэж маш тодорхой зааж өгсөн. Гэвч төрийн хууль, засгийн шийдвэрийг үл тоон салаавч өгч буй том толгойтой дарга, захирлууд байсаар байна. 

   Хөгжлийн банк дэд захирлуудаа бөөнд нь нэг шат буулгаж, газрын дарга болгожээ. Газрын дарга нь хэлтсийн дарга, хэлтсийн дарга нь албаны дарга болж буусан ийм нүд хуурсан залиланг хэрэглэсэн газар ганц эднийх биш. Төрийн банк мөн цомхотгож халах ёстой дэд захирлуудаа газрын дарга, төслийн менежер гэхчлэн өөр нэртэй болгоод, авдаг цалин, ахуй хангамжийг нь хэвээр үлдээсэн дуулдана.  Авдаг цалин, унадаг унаа, үүднийх нь туслах хүртэл хэвээр байхад  хэмнэлт хийсэн гэж үзэх үү Ерөнхий сайд аа? Таны чөлөөл гэсэн дэдүүдийг авч үлдээд байгаа ТУЗ-ын дарга, гүйцэтгэх захирлуудын үйлдлийг та мэдэхгүй байгаа юу, эсвэл мэдсэн ч нүдэн балай сууна уу? Мэдэхгүй байгаа бол нэг шалгаад үзээрэй. Нүглийн нүдийг гурилаар хуурч, төрийн хэмнэлтийн хуулийг биелүүлэхгүй аргалж өнгөрөх гэсэн жишээ олон гарч ирнэ.  

   Төрийн банкаар жишээ татья. Тус банк 5 дэд захирал, 1 ерөнхий эдийн засагчтай байсан. Санхүү хариуцсан дэд захирал Д.Баттулга эдүгээ Түр ажлын хэсгийн ахлагч, захирал,  Үйл ажиллагаа хариуцсан дэд захирал О.Баасансүрэн, Эрсдэл хариуцсан дэд захирал А.Ганбаатар, бизнес хариуцсан дэд захирал Д.Сугар, Ерөнхий эдийн засагч Ганзориг нар менежер,Мэдээлэл технологи хариуцсан дэд захирал Г.Энхтамир газрын дарга болж албан тушаал нь өөрчлөгдсөн. Гэвч цалин хангамж нь хэвээр, албан машин унаж ажилдаа ч ирдэггүй гадуур зугаалдаг нь хэвээр.Хөгжлийн банк мөн адил, газрын дарга нэртэй болсон хуучин дэд захирлуудын цалин хангамж, байр суурь, ааш аяг хэвээр байгаа талаар түрүүн дурьдсан. 

  

   Энэ хоёр банкны ТУЗ-ын дарга нь Сангийн яамны Төрийн нарийн бичгийн дарга Ж.Ганбат. Энэ хүний чиглэл удирдамжаар Хөгжлийн банкны захирал Н.Мандуул, Төрийн банкны захирал Ө.Гантөр нар ийм хууль зөрчсөн үйлдэл хийж сууна уу эсвэл өөрсдөө толгой мэдэн төрийн хэмнэлтийн хуулийг биелүүлэхээс татгалзав уу?

Төрийн хэмнэлтийн хууль зөрчиж, халагдах болзлоо хангалаа  Төрийн хэмнэлтийн тухай хуулийн 21.1-д “Төсвийн  захирагч, энэ  хуулийн 3.1.3, 3.1.4-т заасан этгээдийн   гүйцэтгэх  удирдлага  болон холбогдох  албан  тушаалтан  үйл ажиллагаандаа  санхүүгийн  сахилга бат, хэмнэлтийн  горимыг  мөрдөж ажиллаагүй нь тогтоогдсон бол ажлаас халах үндэслэл болно” гэж заасан.  

   Өчиггүй цомхотго гэсэн дэд захирлуудаа цалин хангамжийг хэвээр авч үлдэн,  хууль зөрчиж байгаа Ө.Гантөр, Н.Мандуул нараа өөрсдийг нь халж явуулахгүй бол Засгийн газар өөрсдөө хууль зөрчсөн хэрэгт унахаар болчихлоо шүү Б.Жавхлан сайд аа!

                                                                                                                                                                                                             Д.Оюу