Нийслэлийн хэмжээнд огт сургуульгүй таван хороо байна

Засгийн газрын Шуурхай штабын өчигдрийн (2025.04.12) хуралдаанаар Боловсролын сайд П.Наранбаяр “ЕБС-ийн сурагчдын зорчилт хөдөлгөөн”, “Хотхоны бага сургуулийн талаарх танилцуулга” илтгэл тавьж хэлэлцүүлсэн.

Боловсролын сайдын өгсөн мэдээллээс хүргэе.

Өнөөдрийн байдлаар дүүрэг хороо хооронд 168 мянган суралцагч, 7.844 багш зорчиж, хичээл, сургуульдаа явж байна.

Эдгээр сурагчдын 90 гаруй мянга нь хотын төвийн сургуулиуд руу зорчдог гэсэн судалгаа гарчээ. 

Энэасуудлыг шийдэхийн тулд гэр хорооллын бүсэд 57 ЕБС барих шаардлага үүсээд байгаа юм. Ингэснээр зорчилт хөдөлгөөн эрс багасаж, түгжрэл 31.7 хувиар буурна. 

Мөн зорчилт хөдөлгөөнд оролцож буй сурагчдын 47.7 мянга нь бага бүлгийн хүүхдүүд байгаа нь “Хотхоны бага сургууль” шаардлагатайг илтгэж байна.

Өнөөдрийн байдлаар нийслэл хотод хүн амын төвлөрөл ихтэй 11, огт сургуульгүй таван хороо байгаа нь 60 бүлэг нэмж хичээллүүлэх шаардлагатайг харуулжээ.

Үүнийг шийдэхийн тулд төр хувийн хэвшлийн түншлэлийг дэмжин, хамтран ажиллах шаардлагатай байгааг Боловсролын сайд илтгэлдээ онцолсон юм.

Засгийн газар 2026 оныг “Боловсролыг дэмжих жил”-ээр зарласан. Боловсролын үйлчилгээг чанартай, хүртээмжтэй болгох, ачааллыг бууруулах зэрэг арга хэмжээ нь нэрэмжит жилийн ажлын чухал хэсэг байх болно. Тиймээс ч Боловсролын жилийн зарим зорилтыг Улаанбаатар хотын замын түгжрэлийг бууруулах зорилготой уялдуулж буйгаа илэрхийллээ.