Ари романс дуулаачдын олон улсын уралдаан эхэллээ

СУИС-иас зохион байгуулдаг гавъяат жүжигчин, профессор О.Ичинхорлоогийн нэрэмжит Ари романс дуулаачдын олон улсын II уралдаан эхэллээ. Уралдаанд оролцогчдыг бүртгэж эхэлсэн бөгөөд ирэх сарын 20-ныг хүртэл явагдана гэж тус сургуулиас мэдээлэв.  Хоёр үе шаттай болох уг уралдааны эхний шатанд С.Бах, Ф.Гендель, А.Моцарт, Л.Бетховен, И.Гайдн, Ж.Перголези, Ж. Жордани, А.Вивальди нарын дуурь, месса, оратори, кантатын нэг ари, XVII-XIX зууны үеийн хөгжмийн зохиолчдын сонгодог дуурийн нэг ари, И.Брамс, Ф.Шуберт, Р.Шуман, Ф.Лист, Э.Григ, Ф.Мендельсон нарын нэг дуу, Монголын хөгжмийн зохиолчийн нэг романс дуулах болзол тавьжээ. Харин хоёрдугаар шатанд XVIII зууны сүүлч XIX зууны үеийн хөгжмийн зохиолчдын сонгодог дуурийн томоохон нэг ари, Монголын хөгжмийн зохиолчийн дуурийн томоохон нэг ари, П.И.Чайковский, С.Рахманинов, Н.Римский-Корсаков, М. Мусоргский, А. Рубинштейн, Ф.Лист нарын нэг романс, Ж.Вердийн дуурийн нэг ари дуулах юм байна. Олон улсын уралдааны эхний шатны шалгаруулалт ирэх зургадугаар сарын 5-нд, хоёрдугаар шатны шалгаруулалт зургадугаар сарын 6-нд болох бөгөөд зургадугаар сарын 7-нд шилдгүүдийн Гала концерт тоглох аж.

Б.Бурам