А.Баярцэцэг мөрөөдлөө биелүүлэхэд нэг алхам ойртлоо

Жүжигчин, мисс А.Баярцэцэг Лондоны их сургуулийн харьяа Эзэн хааны драмын төв сургуульд суралцаж байгаа билээ. Мөрөөдлөө биелүүлэхээр идэвхтэй суралцаж буй тэрбээр Лос Анжелест төвтэй “CSP Management” компанитай хамтран ажиллах гэрээгээ албан ёсоор үзэглэсэн байна. Энэ талаар А.Баярцэцэг “Олон улсад жүжигчний мэргэжлээр төлөөлөн ажиллах, Силвистер Сталлонэгийн дүү Франк Сталлонэгийн менежментийг хийдэг хувийн менежертэй боллоо. Мөрөөдөл биелдэг юм байна” хэмээн цахим хуудастаа бичжээ.
А.Баярцэцэг дэлхийн алдартай спорт брэндийн нэг “Adidas”-ын сурталчилгаанд БНСУ-ын үндэсний хөлбөмбөгийн шигшээ багийн ахлагч Сон Хён Минтэй хамтран тоглосон юм. Дэлгэцийн жүжигчний мэргэжлээр суралцаж буй А.Баярцэцэг “Ээж хадны домог” уран сайхны киноны зураг авалтад оролцсон. Мөн түүний гол дүрд нь тоглосон “Хөх тавилан” уран сайхны кино 41 дэх удаагийн Флоренцийн “Олон улсын эмэгтэй кино уран бүтээлчдийн наадам”-д албан ёсоор шалгарсан билээ. Түүний хувьд 2014 онд АНУ-ын “Netflix” компанийн бүтээл “Марко Поло” кинонд тоглосон бол 2018 онд нээлтээ хийсэн Холливудын алдарт жүжигчин Стивен Сигалын ”Attrition” кинонд ч мөн дүр бүтээсэн. А.Баярцэцэг англи, франц, испани хэлтэй. Олон улсын бизнесийн удирдлагын чиглэлээр мэргэжил эзэмшсэн хөдөлмөрч бүсгүй юм.