2019-2020 онд зарлагдах гадаад улсын Засгийн газрын тэтгэлэгт хөтөлбөрүүд

Гадаадын их дээд сургуулиудад суралцах хүсэлтэй оюутан, залууст зориулж 2019-2020 оны хичээлийн жилд зарлагдах Засгийн газрын тэтгэлгүүдийн мэдээллийг нэгтгэн хүргэж байна.

АНУ-ЫН ФУЛБРАЙТЫН ТЭТГЭЛЭГ /FULBRIGHT/

Фулбрайтын Оюутны хөтөлбөр нь магистрын зэрэг олгох бүрэн тэтгэлэгт хөтөлбөр бөгөөд одоогоор дэлхийн 160 гаруй оронд хэрэгжиж байна.

Тус хөтөлбөр нь нийгмийн ухаан, хүмүүнлэг, инженер, эдийн засаг, бизнесийн судалгаа, төрийн болон төрийн албаны судалгаа зэрэг бүх чиглэлээр зарлагддаг ч эрүүл мэндийн салбарт зөвхөн нийгмийн эрүүл мэндийн судалгааны чиглэлээр АНУ-д суралцах боломжтой.

Уг хөтөлбөр манай улсад 1994 оноос хойш хэрэгжиж эхэлсэн. Жилд 13-15 оюутан хамруулж, магистрын зэргийн бүрэн тэтгэлэг олгодог байна.

Хугацаа: Энэ оны нэгдүгээр сард хөтөлбөрийг Монгол дахь АНУ-ын элчин сайдын яамнаас зарлана.

Үндсэн шаардлага:

1.5 болон түүнээс дээш жилийн бүтэн цагаар ажилласан ажлын туршлагатай байх;

Дээд боловсролтой байх (бакалаврын эсвэл дүйх зэрэг);

Мэргэжлийн чиглэлээсээ хамааран TOEFL IBT 80-90, TOEFL PBT/ITP 550-575, эсвэл IELTS 6.5-7.0 оноотой байх;

Холбоос: https://mn.usembassy.gov/mn/education-culture-mn/scholarships-mn/fulbright-mn/ (https://mn.usembassy.gov/mn/)

АВСТРАЛИ УЛСЫН ЗАСГИЙН ГАЗРЫН ТЭТГЭЛЭГ /AUSTRALIA AWARDS/

Австралийн сургалтын тэтгэлэг нь хөгжлийн төлөө даян дэлхийн манлайлагчдын хойч үеийнхэнд тус улсын засгийн газраас олгодог олон улсын нэр хүндтэй тэтгэлэг юм. Өргөдлийг шаардлагатай баримт бичгийн хамт цахим хэлбэрээр явуулна.

Хугацаа: 2019 оны хоёрдугаар сарын 1-нд эхэлж, дөрөвдүгээр сарын 30-нд дуусна.

Үндсэн шалгуур:

Бакалаврын дипломын голч оноо 3 ба түүнээс дээш байх;

Academic IELTS-ийн голч оноо 5.5-аас доошгүй (эсвэл TOEFL-ийн дүйцэх), нэгж оноо 5-аас доошгүй дүнтэй байна.

2019 оны хоёрдугаар сарын 1-ний байдлаар, хоёроос дээш жил тасралтгүй хөдөлмөр эрхэлсэн гэдгээ нотолно.

Холбоос: https://dfat.gov.au/people-to-people/australia-awards/pages/australia-awards.aspx

БНСУ-ЫН ЗАСГИЙН ГАЗРЫН ТЭТГЭЛЭГ

БНСУ-ын Засгийн газрын тэтгэлэгт хөтөлбөр нь дэлхийн ирээдүйн манлайлагч нарыг дэмжих, олон улсын боловсролын хамтын ажиллагааг хөгжүүлэхийг зорьж байна.

Хугацаа: Жил бүрийн есдүгээр сард зарлагддаг.

Үндсэн шаардлага:

Өргөдөл гаргагч нь элсэн орох хичээлийн жилийн есдүгээр сарын 1-ний өдөр гэхэд бакалавр эсвэл магистрын зэрэг авсан байх ёстой.

Бакалаврын хөтөлбөрт суралцах бол ахлах сургуулийн голч дүн нь 80 хувь хүрсэн байх;

Холбоос: http://http//www.studyinkorea.go.kr/mn/sub/gks/allnew_invite.do

БНХАУ-ЫН ЗАСГИЙН ГАЗРЫН ТЭТГЭЛЭГ

Монгол Хятадын тусгай хөтөлбөр хэрэгжүүлэх төслийн дагуу бакалавр, магистр, докторын сургалтад суралцуулна. Нийт элсүүлэх оюутны тоо дунджаар 200-300 байдаг.

Хугацаа: Жил бүрийн гуравдугаар сард нээгдэж, зургаадугаар сард хаагддаг.

Үндсэн шаардлага:

Бакалаврт суралцах бол 17-25 хүртэлх насны Монгол улсын иргэн байх; Ахлах сургуулийн голч дүн 80-аас дээш байх;

Магистрт суралцах бол бакалаврын зэрэгтэй, 35 хүртэлх насны Монгол улсын иргэн байх;

Докторт суралцах бол магистрын зэрэгтэй, 40 хүртэлх насны Монгол улсын иргэн байх;

Мэргэжлээрээ 2-3 жил ажилласан байх;

Холбоос: http://www.campuschina.org/

БҮГД НАЙРАМДАХ ФРАНЦ УЛСЫН ЗАСГИЙН ГАЗРЫН ТЭТГЭЛЭГ

Монгол, Франц улс хоорондын найрамдалт харилцаа, боловсрол, шинжлэх ухааны салбарын хамтын ажиллагаанд хувь нэмрээ оруулах, өрсөлдөх чадвартай Монгол иргэнийг бэлтгэх зорилгоор тус тэтгэлэгт хөтөлбөрийг хэрэгжүүлж байна. Нийт элсүүлэх оюутны тоо дунджаар 10 байдаг.

Хугацаа: Гуравдугаар сард нээгдэж дөрөвдүгээр сард хаагддаг.

Үндсэн шаардлага:

Өргөдөл гаргагч нь 25-35 нас хүртэлх Монгол улсын иргэн байх;

Мэргэжлээрээ 3-5 жил ажилласан байх;

Франц хэл: DELF (Франц хэлний сургалтын диплом) 2 дахь шатны буюу CECRL –н B2 түвшин ; DALF (Франц хэлний гүнзгийрүүлсэн шатны диплом) ; TCF –н диплом B2 түвшингээс дээш болон нэмэлт шалгалтын диплом;

IELTS 6.5 аас дээш оноотой байх;

Холбоос: https://mn.ambafrance.org/-Mongol-

ГЕРМАНЫ ЗАСГИЙН ГАЗРЫН ТЭТГЭЛЭГ /DAAD/

Герман улсын засгийн газраас жил бүр 100 мянга гаруй оюутнуудад тэтгэлэг олгон дэлхийд тэргүүлэх боловсролын зэргээр хангаж байна.

Хугацаа: Жил бүрийн наймдугаар сард зарлагдаж, аравдугаар сард хаагддаг.

Үндсэн шаардлага:

Та бакалаврын зэргээ сүүлийн 6 жилийн дотор хамгаалсан байх шаардлагатай. 18 наснаас эхлэн өргөдөл гаргах боломжтой.

Холбоос: https://www.daad.de/en/

ИХ БРИТАНИЙН ЗАСГИЙН ГАЗРЫН ЧЕВИНИНГИЙН ТЭТГЭЛЭГ /CHEVENING/

Чевенинг нь Их Британийн Засгийн газраас академик мэдлэг өндөртэй, олон улсын манлайлагч залуучуудад олгодог тэтгэлэг юм.

Тус улсын магистрын хөтөлбөр нь нэг жилийн хугацаатай байдаг. Монгол улсаас жилд дунджаар 10-20 оюутан элсүүлдэг.

Хугацаа: Жил бүрийн наймдугаар сард нээгдэж, арваннэгдүгээр сард хаагддаг.

Үндсэн шаардлага:

Өргөдөл гаргагч нь 25-35 нас хүртэлх Монгол улсын иргэн байх;

Дээд боловсролтой байх (бакалаврын эсвэл дүйх зэрэг);

Бакалаврын голч оноо 3.0 ба түүнээс дээш байх /2.8, 2.9 оноог хүлээн зөвшөөрөхгүй/

IELTS 6.5, TOEFL IBT 79 оноотой байх;

2 ба түүнээс дээш жилийн ажлын туршлагатай байх;

Хөтөлбөрөө дуусаад 2 жилийн дотор эх орондоо эргэн ирэх;

Холбоос: http://www.chevening.org/

ОХУ-ЫН ЗАСГИЙН ГАЗРЫН ТЭТГЭЛЭГ

ОХУ-ын Засгийн газрын тэтгэлэгт хөтөлбөр нь оюутан залуусыг Орос улсын дэлхийн шилдэг дээд боловсролын байгууллагад суралцах боломжийг олгоход чиглэсэн хөтөлбөр болно. Нийт элсүүлэх оюутны тоо 300-500 байдаг.

Хугацаа: Жил бүрийн нэгдүгээр сард нээгдэж, хоёрдугаар сард хаагддаг.

Үндсэн шаардлага:

Бакалаврт суралцах бол 21 нас хүртэлх Монгол улсын иргэн байх; Ахлах сургуулийн голч дүн 80-аас дээш байх;

Магистр, докторт суралцах бол бакалаврын зэрэгтэй, 35 хүртэлх насны Монгол улсын иргэн байх;

Орос хэлний бэлтгэл бүрэн хангасан байх, эсвэл Монгол Улсын орос хэлний гүнзгийрүүлсэн сургалттай болон ОХУ-ын их дээд сургуулийг 3.0 оос дээш хувийн амжилттай суралцаж төгссөн байх;

Холбоос: http://mng.rs.gov.ru/ru/activities/697

ШИНЭ ЗЕЛАНД УЛСЫН ЗАСГИЙН ГАЗРЫН ТЭТГЭЛЭГ

Тус улсын Засгийн газрын Монгол оюутнуудад зориулсан тэтгэлэгт хөтөлбөрийг удахгүй зарлах гэж байна. Энэ нь жилд 11,000 өргөдлийг хүлээн авч 560 оюутныг сонгон шалгаруулдаг маш өрсөлдөөнтэй тэтгэлэг юм.

Хугацаа: 2019 оны хоёрдугаар сарын 15-нд нээгдэж, гуравдугаар сарын 28-нд хаагдана.

Холбоос: https://www.mfat.govt.nz/en/aid-and-development/new-zealand-government-scholarships/new-zealand-scholarships-for-international-tertiary-students/apply-online-for-a-new-zealand-scholarship/application-opening-and-closing-dates-for-your-country/

УНГАР УЛСЫН ЗАСГИЙН ГАЗРЫН ТЭТГЭЛЭГ

Унгарын Засгийн газрын тэтгэлгээр 2019/2020 оны хичээлийн жилд Монгол оюутнууд суралцуулах сонгон шалгаруулалт эхэлжээ.

Сонгон шалгаруулалт 2 үе шаттай зохион байгуулагдах бөгөөд I шатны шалгаруулалтыг Боловсрол, соёл, шинжлэх ухаан, спортын яам, II шатны шалгаруулалтыг Унгарын хүлээн авч суралцуулах сургууль тус тус зохион байгуулна.Шалгаруулалтад тэнцсэн иргэдийн суралцах эцсийн шийдвэрийг Унгарын Тэтгэлгийн хороо хүлээн авч, суралцуулах сургууль гаргана.

Өргөдөл хүлээн авах хугацаа: 2018 оны арванхоёрдугаар сарын 1-нээс 2019 оны нэгдүгээр сарын 15-ны өдрийг хүртэл цахим хуудсаар бүрэн, гүйцэд бөглөсөн анкет, холбогдох баримт бичгийг хүлээн авна.

Үндсэн шаардлага:

Бакалаврт суралцах бол 17-25 нас хүртэлх Монгол улсын иргэн байх;

Магистрантурт суралцах бол бакалаврын зэрэгтэй, 35 хүртэлх насны Монгол улсын иргэн байх;

Өргөдөл гаргагч зөвхөн Боловсролын яамны дурдсан мэргэжлийн чиглэлээр суралцах боломжтой.

Холбоос: http://studyinhungary.hu/study-in-hungary/menu/stipendium-hungaricum-scholarship-programme

ЯПОН УЛСЫН ЗАСГИЙН ГАЗРЫН ТЭТГЭЛЭГТ ХӨТӨЛБӨР

/Их сургуулийн үндсэн оюутан, Техникийн коллеж, Мэргэжлийн сургууль, Судлаач оюутан/

Япон улсын Засгийн газрын тэтгэлэгт хөтөлбөр /Судлаач оюутан, Их сургуулийн үндсэн оюутан, Техникийн коллеж, Мэргэжлийн сургууль, Судлаач оюутан/-ийн бүртгэл зарлагдлаа.

Бүртгэл Монгол Японы Төв дээр явагдана. (Монгол-Японы төвөөс асууж лавлахгүй байхыг хүсье) Хөтөлбөр тус бүрийн удирдамж, болон шаардлагатай бүрдүүлэх материал, авах шалгалтын жагсаалт зэрэгтэй дараах холбоосоор орж танилцана уу.

Их сургуулийн үндсэн оюутан

Техникийн коллеж

Мэргэжлийн сургууль

Судлаач оюутан

Жич:

Өнгөрсөн жилүүдийн шалгалтын материалуудтай дараах холбоосоор орж танилцах боломжтой.

http://www.studyjapan.go.jp/en/toj/toj0302e-32.html#1