Дэниел Крэйг зураг авалтын үеэр бэртэж шагайндаа мэс засал хийлгэнэ

Их Британийн жүжигчин Дэниэл Крейг тагнуулч Жеймс Бондын тухай 25 дахь киноны Ямайк дахь зураг авалтын үеэр шагайндаа гэмтэл аван АНУ-д хүргэгджээ.

Түүнд яаралтай мэс засал хийхээр болсон тухай “Mirror“ сонинд бичсэн байна. Мэс заслын дараа Дэниэл Крейг хоёр долоо хоногийн турш нөхөн сэргээх эмчилгээ хийлгэх ч киноны зураг авалт үргэлжилж, төлөвлөгөөний дагуу 2020 оны дөрөвдүгээр сард дэлгэцнээ гарах аж.

Тагнуулч 007 буюу Жеймс Бондын тухай ээлжит кинонд түүнээс гадна Францын жүжигчин бүсгүй Леа Сейду, Америкийн Рами Малек, Их Британийн Рейф Файнс, Бен Вишоу нар тоглож байна.

 “Доктор Үгүй” (“Dr. No”) нэртэй Жеймс Бондын тухай анхны киноны нээлт 1962 оны аравдугаар сарын 5-нд Лондонд болсон бөгөөд алдарт тагнуулчийн дүрд Дэниэл Крейгээс гадна Шон Коннери, Жорж Лезенби, Рожер Мур, Тимоти Далтон, Пирс Броснан нар тоглож байжээ.

Б.Туг