“Дакар ралли-2019” тэмцээнд оролцсон баг тамирчдыг шагнав

Автоспортын олимп хэмээгддэг “Дакар ралли-2019” тэмцээн Өмнөд Америкийн Перу улсын нутаг дэвсгэрт өнгөрсөн нэгдүгээр сарын 6-17-ний өдрүүдэд зохион байгуулагдсан. Эл уралдаанд ОУХМ Ө.Бямбадэлгэр, ОУХМ Ө.Бямбацогт, мотоспортын ОУХМ Б.Баттөр нар Монгол Улсаа төлөөлөн оролцож, 5000 гаруй км элсэн цөлийг туулж, 68 улсын 334 багаас “Аuto” төрөлд 32 дугаар байр, “Utv open” ангилалд III байрт шалгарсан билээ. Мөн сэтгүүлч Б.Онон уг автоспортын тэмцээнийг сурвалжлан, уралдааны талаарх мэдээллийг монголынхоо үзэгчдэд цаг алдалгүй хүргэж байсан юм.

МҮОХ-ны Ерөнхий нарийн бичгийн дарга Э.Бадар-Ууган “Дакар Ралли-2019” тэмцээнд оролцсон баг тамирчдыг өнөөдөр хүлээн авч хүндэтгэл үзүүлэн, ОУХМ Ө.Бямбадэлгэр, ОУХМ Ө.Бямбацогт нарт МҮОХ-ны "Алтан Очир" одон, ОУХМ Б.Баттөрд "Алтан медаль", сэтгүүлч Б.Ононд "Олимпийн Алдар" одон гардууллаа.