Месси Испанийн Примера лигт 400 гоол оруулсан анхны хөлбөмбөгчин боллоо

“Барселон”-ы аргентин довтлогч Лионел Месси Испанийн дээд лиг Примерагийн түүхэнд 400 гоол оруулсан анхны хөлбөмбөгчин болжээ.

Примерагийн ээлжит тойргийн тоглолтод “Барселон” талбай дээрээ “Эйбар”-ыг 3:0-ээр хожиход Луис Суарес хоёр, харин Лионел Месси нэг удаа гоолдсон байна. Тэрээр Примерад 435 удаа тоглохдоо ийнхүү 400 дахь гоолоо оруулжээ. Энэ улиралд тэрээр 17 тоглолтод 17 гоол оруулж, 10 гоолын дамжуулалт хийгээд байгаа юм.

Энэ үзүүлэлтээр Мадридын “Реал”-д 292 удаа тоглохдоо 311 гоол хийсэн Криштиану Роналду, “Атлетик”-ийн Телмо Сарра (277 тоглолтод 251 гол) нар удаалдаг байна.  

Б.Туг