“Нисдэг холландууд” “Бундес машин”-ыг эвдэн хэсгээ тэргүүллээ

Европын Үндэстнүүдийн лиг.

“А” дивизион. Хэсэг 1.

Герман – Нидерланд – 2:2 (Вернер, 9. Сане, 20 – Промес, 85. Ван Дейк, 90)

Европын Үндэстнүүдийн лигийн “А” дивизионы I хэсэгт дэлхийн шинэхэн аварга Францыг дуулиантайгаар хожсон Нидерланд сүүлийн зургадугаар тойрогт шинэчлэлийн амаргүй үеийг туулж буй Германтай тэнцэхэд л хангалттай байв. Роналд Куманы удирдлага дор дахин сэргэн далавчаа дэлгэж эхэлсэн “Нисдэг холландууд” “В” дивизион руу буух нь тодорхой болсон “Бундес машин”-тай хийсэн амаргүй тулаанд сүүлийн таван минутад оруулсан хоёр гооолын ачаар зорьсондоо хүрч чадлаа.

Ингэснээр, Үндэстнүүдийн лигийн шигшээ тэмцээнд тус тусын хэсгээ тэргүүлсэн Нидерланд, Швейцар, Португал, Английн багууд өрсөлдөхөөр шилэгдэв. Шигшээ тэмцээн Португалд ирэх жилийн зургадугаар сарын 5-9-нд болж аваргаа тодруулах юм.

Харин элит “А” дивизионоос Германаас гадна Хорват, Польш, Исланд хасагдан “В” дивизион руу зиндаа буурчээ.

Б.Туг