ХАКҮХО ДЭЭД ЗИНДААНД 41 ДЭХ ТҮРҮҮГЭЭ АВЛАА

Их аварга Хакүхо М.Даваажаргал өнөөдөр озэки Гойэдог давснаар мэргэжлийн сүмогийн дээд зиндаанд 1000 дахь даваагаа авч, 41 дэх удаагаа түрүүлэх болзлыг хангалаа. Түүний араас нөхөж явсан озэки нар өнөөдөр бүгд өвдөг шорооджээ. Их аварга Какүрюү М.Ананд өнөөдөр мөн унаснаар тэмцээнийг 10 даваа дөрвөн унаатай үргэлжлүүлж байна. Тамаваши Б.Мөнх-Оргил өнөөдөр учраадаа өвдөг шороодож гурван даваа, 11 унаатай болжээ. Харин Ичиножёо А.Ичинноров өнөөдөр давж, даваа унаа тэнцээд байна. 

Их аварга Хакүхо М.Даваажаргал маргааш их аварга Какүрюү М.Анандтай барилдах юм. Хакүхо дээд зиндаанд 41 дэх түрүүгээ авснаар мэргэжлийн сүмогийн дээд амжилтын босгыг улам өндөрсгөж байна. Тэрээр их аварга цолтой хамгийн олон башёд барилдсан, хамгийн олон башёд түрүүлсэн, дээд зиндаанд хамгийн олон даваа авсан, нэг жилийн барилдаануудад хамгийн олон даваа авсан зэрэг нийт долоон дээд амжилтын эзэн болоод буй юм. Мэргэжлийн сүмогийн дээд зиндаанд 41 түрүүлсэн түүний амжилтыг ойрын 30-40 жилд эвдэх боломжгүй хэмээн сүмо сонирхогчид, судлаачид үзэж байгаа ажээ.