Пауэрлифтингийн дэлхийн аваргын тэмцээн Улаанбаатарт болно

Монгол Улсад болох Пауэрлифтингийн мастеруудын дэлхийн аваргын тэмцээн нь гурван төрлөөр аравдугаар сарын 1-6-ны хооронд “Holiday Inn” зочид буудлын зааланд болно. Тэмцээнд 26 улсын баг тамирчин оролцохоор мэдүүлгээ өгөөд байгаа аж. Тус тэмцээнийг Монгол Улсын Засгийн газар, Биеийн тамир спортын газар дэмжиж Монголын Хүндийн өргөлтийн холбооноос зохион байгуулах юм. Тэмцээнд манай улсаас 27 тамирчин оролцож хүч тамираа сорино хэмээн Япон Улсын Китакюшю хотод Ази, Номхон далайн орнуудын парапауэрлифтингийн аварга шалгаруулах тэмцээнд -107 кг жинд 239 кг шахаж Азийн рекордыг эвдсэн Э.Содномпилжээ мэдээллээ.

Мөн энэ үеэр АНЭУ-д энэ сарын 18-24-ний өдөр болох хэвтээ шахалтын Азийн аварга шалгаруулах тэмцээнд хүч үзэх Пауэрлифтингийн ОУХМ Ц.Баярхүү сэтгүүлчдэд мэдээлэл өгсөн. Тус тэмцээнд манай улсаас Азийн тэмцээнд оролцож байсан туршлагатай таван тамирчин оролцох болсон. Бэлтгэл бүрэн хангагдсан, өмнө Ази тивийн тэмцээнд ялагдаж байсан тамирчинтайгаа таарч даагаа нэхэх боломж олдлоо. 11 дүгээр сард Швед улсад болох Дэлхийн аварга шалгаруулах тэмцээнд манай улсаас найман тамирчин хүч сорино" гэв.

Хүндийн өргөлтийн холбооноос 12 дугаар сарын 4-8-ны өдөр Классик Пауэрлифтингийн Азийн аварга шалгаруулах тэмцээнийг эх орондоо зохион байгуулахаар төлөвлөж байгааг ч дуулгав.