3х3 FIBA: Монголын шигшээ баг анхны ялалтаа байгуулав

Олон улсын сагсан бөмбөгийн холбооноос зохион байгуулж буй 3х3 дэлхийн аварга шалгаруулах тэмцээн Филиппин улсын Манила хотод үргэлжилж байна. Эрэгтэйчүүдийн ангилалд шилдэг 20 баг оролцож байгаагаас Монгол Улсын шигшээ баг ОХУ, Бразил, Канад, Филиппиний багтай “С” хэсэгт багтсан билээ.

Манай улсын баг тамирчид эхний тоглолтоо Канадтай хийж, 21:15-аар ялагдаад байсан. Тэгвэл хоёр дахь тоглолтыг тэмцээнийг зохион байгуулагч Филиппин улсын багтай хийсэн юм. Хэдэн мянган хөгжөөн дэмжигчдийнх нь өмнө хожих хүндхэн даалгавартай гарсан Монгол Улсын баг хүчтэй гэдгээ харуулж, 21:15-аар үндсэн цаг дуусахаас өмнө эзэн орны багийг ялсан юм. Дараагийн учраа өнөөдөр буюу энэ сарын 11-нд 15:30 цагаас ОХУ-ын шигшээтэй, тухайн өдрийн 17:10 цагаас Бразилын багтай тус тус тоглох ажээ.