Оны шилдэг даамчид тодорлоо

Оны шилдэг даамчныг шалгаруулах “Final 2017” тэмцээн энэ сарын 18-24-нд болж, гавьяат тамирчин, Их мастер Д.Эрдэнэбилэг боломжит 26 онооноос 21 оноо авч тэргүүлэв.

“Өргөө” амаржих газрын фитнес танхимд болсон “Алтан хүү” клубээс зохион байгуулдаг тус тэмцээнд шилэгдмэл 14 даамчин өрсөлдсөн юм. Тэд тив, дэлхийн тэмцээнүүд явагддаг цагийн хяналт (үндсэн цаг 80 мин+нүүдэл бүрт 1 минут)-аар тойргийн журмаар тоглож дүнгээ гаргалаа. Оролцогчдыг цол зэргээр нь ангилвал Олон улсын их мастер цолтон 4, Дэлхийн даамын холбооны мастер 5, спортын мастер 5 байв.

Чансаа олгох цувралуудад хамгийн өндөр буюу 244 оноо цуглуулсан Д.Эрдэнэбилэг шигшээ тэмцээнд бусдаасаа илүү байсан юм. Харин II, III байрт энэ оны улсын аварга ОУИМ Г.Ганжаргал 18, өнгөрсөн жилийн “Final 2016” тэмцээний ялагч ДДХМ Ц.Хашчулуун 17 оноогоор тус тус шалгарлаа.

Энэ үеэр болсон түргэвчилсэн тоглолтын тэмцээнд ДДХМ Ц.Сүхбат, Б.Мөнхжин, ОУИМ Г.Ганжаргал нар эхний гурван байрыг эзэлсэн байна.