Суугаа волейболын анхдугаар тэмцээн боллоо

Хөгжлийн бэрхшээлтэй иргэдийг дэмжих Олон улсын өдрийг угтан Хан-Уул дүүргийн Засаг даргын Тамгын газраас өнгөрсөн бямба гаригт Хан-Уул дүүргийн нэрэмжит шилжин явах цомын аварга шалгаруулах суугаа волейболын анхдугаар тэмцээнийг зохион байгууллаа.

Тэмцээнийг санаачлан, зохион байгуулагч Хан-Уул дүүргийн Засаг даргын Тамгын газрын зүгээс цаашид хөгжлийн бэрхшээлтэй иргэдэд усан спорт, байт харваа зэрэг спортоор хичээллэх нөхцөлийг ханган, дэмжиж ажиллана гэдгийг Хан-Уул дүүргийн Засаг даргын Тамгын газрын дарга Б.Энхболд онцолж байв. Мөн дүүргийн нэрэмжит энэхүү тэмцээнийг жил бүр уламжлал болгон зохион байгуулахаар шийдвэрлэжээ.

Анхны тэмцээнд нийслэлийн Баянзүрх, Сонгинохайрхан, Сүхбаатар, Хан-Уул, Чингэлтэй дүүргийн баг тамирчид оролцож, дараах байрыг эзэлжээ.

• Чингэлтэй дүүргийн баг - Алт медаль, шилжин явах цом
• Баянзүрх дүүргийн баг - Мөнгөн медаль, Мөнгөн шагнал
• Хан-Уул дүүргийн баг - Хүрэл медаль, мөнгөн шагнал тус тус хүртлээ.

Шилдэг тоглогчоор Чингэлтэй дүүргийн тамирчин А.Баярхүү, Хан-Уул дүүргийн Г.Соёлсайхан нар шалгарч, өргөмжлөл, мөнгөн шагналын эзэд болов.

Дүүргийн Засаг даргын Тамгын газар, Хөгжлийн бэрхшээлтэй иргэдийн холбооноос Хан-Уул дүүргийн багийн тамирчин, 2 дугаар хорооны иргэн Нармандах, 6 дугаар хорооны иргэн Цэвэлмаа, 11 дүгээр хорооны иргэн Г.Соёлсайхан нарт мөн энэ үеэр тусгай хэрэгсэл гардуулжээ.