Д.Трампын лимузин Бельгийн хааны ордны хашааны хаалгаар багтсангүй

Өнгөрөгч долоо хоногийн лхагва гарагт АНУ-ын Ерөнхийлөгч Дональд Трамп эхнэрийнхээ хамт Бельгийн хаан Филипптэй уулзахаар ирэхдээ унаж явсан “Араатан” хэмээх хуягласан лимузин автомашин нь хааны ордны хашааны хаалгаар багтаагүй тухай “La Libre Belgique” сонинд бичжээ.

“Хааны хүлээн авалтанд уригдсан төрийн тэргүүн нар хааны ордны хашаанд орсныхоо дараа машинаасаа буудаг. Харин Д.Трамп хааны ордонд орохын тулд машинаасаа бууж хашаан дундуур явган алхахаас аргагүй болжээ” гэж нэрээ нууцалсан нэгэн түшмэлийн ярьсныг тус сонинд иш татсан байна. Гэхдээ энэ үйлдлээ Ерөнхийлөгч Д.Трамп Нууц албаны ажилтнуудтай зөвшилцөн тохирсон байсан гэж эх сурвалж тэмдэглэн хэлжээ.

“Араатан” /The Beast/ гэдэг нэртэй Ерөнхийлөгчийн лимузин нь Ерөнхийлөгчийн хамгаалалтын албаны тавьж буй шаардлагын дагуу сайжруулсан Cadillac юм. 6,8-9,1 тонн жинтэй уг машин нь 200 мм-ийн зузаан хуягласан хаалга, 130 мм зузаан сум нэвтэрдэггүй шилтэй аж. Түүнээс гадна, дугуй нь хагарсны дараа ч явж чаддаг, зорчигчийн хаалга нь цоожгүй бөгөөд зөвхөн нууц албаны ажилтны мэддэг кодоор онгойдог байна.