“Яг түүн шиг-2” шоуны найм дахь оролцогч хэн бэ

Урлагийн салбар салбарын төлөөллүүд нэгэн тайзнаа чуулан дэлхийн болоод Монголын урлагийн оддын дүр төрх, дуу хоолой, уран бүтээлийг амилуулдаг “Яг түүн шиг” шоуны хоёр дахь улирал тун удахгүй “Боловсрол суваг” телевизээр хүрэхэд бэлэн болжээ.“Эндемол Шайн” группийн албан ёсны эрхтэйгээр 2016 онд анх зохион байгуулсан “Яг түүн шиг” шоуг үзэгчдийг хоёр сар цэнхэр дэлгэцийн өмнө уян цахим ертөнцийн гол ярианы сэдэв болж байсан билээ.

Тэр ч утгаараа “Яг түүн шиг” шоуны хоёрдугаар улирлыг тэсэн ядан хүлээсэн үзэгчид оролцогчдыг хэн байх талаар таавар хүртэл дэвшүүлээд амжсан юм. Ирэх дөрөвдүгээр сарын 2-нд эхлэх “Яг түүн шиг-2” шоу арван долоо хоног үзэгчдийг байлдан дагуулж, дэлхийн "од"-дыг нэгэн тайзнаа чуулуулах нь ээ.

“Боловсрол суваг” телевиз өнөөдөр хэвлэлийн бага хурал хийн “Яг түүн шиг” шоуны хоёрдугаар улирлын оролцогчдыг зарлалаа. Энэ удаагийн шоунд “Камертон” хамтлагийн дуучин Г.Мэнд-Амар, дуучин А.Хишигдалай, “ХТүц” хамтлагийн жүжигчин Г.Бархүү, “Эмоци” хамтлагийн жүжигчин Б.Ариунцэцэг, дуучин Б.Халиун, БНСУ-д уран бүтээлээ туурвидаг дуучин С.Гантогоо, төгөлдөр хуурч Алимаа буюу Ами нар оролцохоор болжээ. Гэхдээ өнөөдөр тэд найм дахь оролцогчоо зарласангүй. Тэрхүү “нууц эрхэм” хэн болох нь гэнэтийн бэлэг байх гэнэ. Тиймээс шоуны эхний дугаараас нууц байгаа найм дахь оролцогч олны өмнө ил болно гэдгийг зохион байгуулагчид дуулгалаа.

Т.Бархүү: Өөрийнхөө чадлын хэмжээгээр энэ нэвтрүүлгийг хөглөх болно

Т.Бархүү: Монголчуудыг байлдан дагуулсан энэ гайхалтай, хүчирхэг бас маш их хариуцлага үүрсэн нэвтрүүлэгт орж байгаадаа их баяртай байна. Бас их айдастай байгаа. Олон хүн чамайг дэмжинэ гэж хэлсэн. Тэр хүмүүсийн урмыг нь хугалахгүй яаж оролцох вэ гэдэг маш том хариуцлага. Эмээлт, айдастай байгаа ч өөрийнхөө чадлын хэмжээнд энэхүү нэвтрүүлгийг хөглөж, эдгээр оролцогчидтойгоо хамтдаа нэг шат ахисан улам сайхан болгохын төлөө зорьж ажиллахаар бид сэтгэл шулуудсан залуус, уран бүтээлчид энд цугласан байгаа. Дуучны хувьд бол би өөрийгөө чамладаг. Би дуу бичүүлж явсан үе байгаа. Тэр бол миний сонирхол, хобби байсан. Гэхдээ би дуучны карьераар явах хүн биш гэдгээ мэдрээд жүжигчний карьераа илүү хөөхөөр болсон. Тэр сайхан хүсэл зоригийг минь дэмжиж тухайн үед хамтарч ажиллаж байсан бүх хүмүүст баярласнаа илэрхийлсэн. Харин энэхүү нэвтрүүлэгт эдгээр олон сайхан уран бүтээлчидтэй хамтран оролцож байгаадаа баяртай байна. Ялангуяа манай домог болсон “Boy band” хамтлаг болох “Камертон” хамтлагийн дуучин Мээдээтэйгээ хамт орж байгаадаа маш их баяртай байна. Энд өнөөдөр найм дахь оролцогч нь тодорхой бус байгаа. Хэн байгаа нь эргэлзээтэй байгаа тэр хүнээс их айж байна. Энд байгаа мундаг дуучиддаа амжилт хүсье.

Г.Мэнд-Амар: Бид хамаг хүч чадал боломжоо дайчлан тайзнаа жинхэнэ энтертайнмент шоуг үзүүлнэ

“Камертон” хамтлагийн дуучин Г.Мэнд-Амар: Шинэхэн хавартай таараад олон улсын дэлхийн том төсөл “Яг түүн шиг” шоу Монголд хоёр дахь удаагаа зохион байгуулагдаж байгаад маш их баяртай байна. Миний хувьд би айхтар мундаг дуучин биш шүү. “Камертон” хамтлагийнхаа гурвынхаа ард “бөн бөн бөн” гээд л байж байдаг гэдгийг та бүхэн мэдэж байгаа байх. Гэхдээ өнөөдөр “Яг түүн шиг” шоунд урлагийн тайзан дээр янз бүрийн шийдлүүдийг үзүүлж байдаг төрөл бүрийн хүмүүс энд цугласан байгаа. Та бүхэн биднийг өөр өөр төрхөөр харна. Бид хамаг хүч чадал боломжоо дайчлан тайзнаа жинхэнэ энтертайнмент шоуг та бүхэндээ үзүүлэхийн төлөө хичээх болно гэж хэлмээр байна. Би хамгийн сүүлд гаргасан цомгоо оройлогчдодоо дурсгаж байна. Энийг сонсоод манай өрсөлдөгч нар намайг хэр хэмжээний өрсөлдөгч вэ гэдгийг сонсоорой. Боловсрол телевиз энэ 10 жилд төрөл бүрийн боловсрол, мэдлэгийг үзэгчдэдээ хүргэсээр ирсэн. “Яг түүн шиг-2” төсөлд хамрагдаж байгаа бид “Боловсрол” телевизийнхэнтэйгээ маш сайн хамтран ажиллах болно. Мөн бид сонголтоор бидэнд таарч байгаа дуучдын талаар мэдлэг мэдээллийг давхар хүргэж өгөх болно гэдгээ амламаар байна.

Ами: Эцсийг нь тултал үзүүлнэ

Төгөлдөр хуурч Ами: сэтгэл маш их догдолж байна, их зориг гаргаж орсон. Дуучид, жүжигчид гээд мундаг уран бүтээлчидтэй хамт орж байгаадаа баяртай байна. Ямар ч байсан өөрийнхөө бүх боломжоор эцсийг нь тултал үзүүлнэ гэж бодож байна.

С.Гантогоо: Хүндэлж биширдэг хүмүүстэйгээ Монголын үзэгчдийг байлдан дагуулж байгаа шоунд оролцох болсондоо баяртай байна

БНСУ-д уран бүтээлээ туурвидаг дуучин С.Гантогоо: Энэ гайхалтай саналыг хүлээж аваад тухайн үедээ надад жаахан бодох хугацаа өгөөч ээ гэж хэлсэн. Энэ саналыг надад тавьсан “Боловсрол” суваг телевизийн хамт олонд баярлалаа гэж хэлмээр байна. Солонгост 10 жил болоод хүрч ирлээ. Эх орон маань гайхалтай байна. Ийм сайхан өөрийнхөө хүндэлж биширч явдаг хүмүүстэй Монголын үзэгчдийг байлдан дагуулж байгаа энэ сайхан шоунд оролцох болсондоо туйлын их баяртай байна. Өөрийнхөө бүхий л нөөц бололцоог шавхан ажиллах болно. Өрсөлдөгчдөдөө амжилт хүсье.

Б.Халиун: Энэ шоунд ямар ч уран бүтээлчийн дууг дуулж чадахаа харуулна

Дуучин Б.Халиун: Сэтгүүлчидтэй уулзаагүй хэсэг хугацаа өнгөрсөн байх. Энэ хугацаанд хувийн амьдралдаа маш том уран бүтээлийг хийсэн байгаа. Бид хоёрын хувьд гурван хүүтэй болсон. Гэхдээ зүгээр суусангүй, хажуугаар нь уран бүтээлээ хийлээ. Тун удахгүй өөрийн ганцаарчилсан соло цомгийг гаргах гэж байгаа. Цаашдаа ганцаараа уран бүтээлээ гарган дуулаад явна. “Боловсрол” телевизээс ийм сайхан шоунд оролцох санал тавихад баяртайгаар хүлээж авсан. Өмнөх улирлын дугаар бүрийг цэнхэр дэлгэцийнхээ өмнө шимтэн суугаад догдлон үздэг байсан. Гэр бүлээрээ үздэг байсан гоё шоу. Энэ шоунд ямар ч уран бүтээлчийн дууг дуулж чадахаа харуулна гэж бодож байна. Шоун дээрээ бүгдээрээ уулзъя.

Б.Ариунцэцэг: Үзэгчдийг уйдаахгүй, сонин содон үзүүлбэрийг үзүүлнэ гэдэгт өөртөө итгэлтэй байгаа

“Эмоци” хамтлагийн жүжигчин Б.Ариунцэцэг: Миний хувьд “Яг түүн шиг”шоундоролцох санал хүлээж аваад маш их айсан. Юу билээ, яагаад намайг сонгож байгаа юм бол гэдэг бодол хамгийн түрүүнд орж ирсэн. Дээрээс нь маш их айж байна. Өөртөө жаахан итгэл муутай байгаа ч намайг сонгоод хүн итгэл хүлээлгэж байхад яахаараа би чаддаггүй юм бэ гэсэн эрмэлзэл надад төрж эхэлж байгаа. Жүжигчин хүн бүх тал дээр хөрвөх чадвартай байх ёстой учраас тэр чадвараа үзэгч олон та бүхэндээ харуулахын төлөө маш их тэмцэх болно. Тултал нь ажиллаж, хөдөлмөрлөх болно. Үзэгчдийг уйдаахгүй, сонин содон үзүүлбэрийг үзүүлнэ гэдэгт өөртөө итгэлтэй байгаа шүү.

А.Хишигдалай: Дуртай зүйлээ хийж байгаа учраас маш сайн оролцоно

Дуучин А.Хишигдалай: Залуу дуучдыг дэмжиж карьерт нь маш их нөлөө үзүүлж байгаа “Боловсрол” телевизийнхэнд маш их баярлаж байна. Ийм том хэмжээний, хүмүүсийг гоё өнцгөөс харуулж чаддаг шоу хийж байгаад баярлаж байна. Мэдээж энэ шоунд орно гэдэг бол миний хүсэл болсон байсан. Анхны шоунд орж чадаагүй болохоор дараагийнх нь шоунд заавал орно гэж бодож байсан. Тийм учраас хүссэн зүйлээ хийж байгаа учраас маш сайн оролцоно гэж бодож байна. Оролцогч дундаа би хамгийн бага нь. Хамгийн бага нь юм чинь хамгийн адтай нь. Би ер нь “урна аа”. Бүх оролцогчдодоо амжилт хүсье. Бүгдээрээ өмнөх улирлын оролцогчдоос дутахааргүй гоё гэр бүл болно шүү.

“Яг түүн шиг” шоу нэвтрүүлгийн хагас шигшээ болон шигшээ тэмцээний оролцогчдын нүүр хувиргалтыг ОХУ-ын тусгай нүүр хувиргалтын “FX Pro LAB” компанийн Алексей Ивченкогоор ахлуулсан багийнхан хийж гүйцэтгэх аж.

Эргэн сануулахад, “Яг түүн шиг” шоуны анхны дугаарт “Камертон” хамтлагийн дуучин Л.Ган-Эрдэнэ, жүжигчин Н.Мөнхсоёл, загвар өмсөгч Э.Энхболд, дуучин Б.Маралжингоо, загвар өмсөгч С.Сарнай, дуучин П.Баярцэнгэл, дуучин Э.Энхзол, дуучин Б.Амархүүнарын найман оролцогч 10 дугаарын турш Монголын болон дэлхийд алдартай уран бүтээлчдийн дуу хоолой, үйл хөдлөлийг дуурайн, тэдний дүрд хувиранөрсөлдөж шоуны ялагчаар “Монгол Витас” буюу дуучин П.Баярцэнгэл шалгарч, 50 сая төгрөгийн эзэн болсон билээ.

Хуваалцах

Жиргэх

Хэвлэл мэдээллээр 2017-03-25