Оютны сургалтын төлбөрийн зээлийг олгож эхэллээ

Засгийн газрын 2016 оны аравдугаар сарын 5-ны өдрийн хуралдаанаар Боловсролын зээлийн сан байгуулж, сургалтын төлбөрийн зориулалттай оюутны зээлийг олгох шийдвэрийг гаргасан билээ. Оюутанд зориулсан зээлийг олгох гэрээнд Боловсрол соёл, шинжлэх ухаан, спортын яам, Төрийн банк болон арилжааны Хаан, Голомт, Хас, Капитрон, Улаанбаатар хотын банкны төлөөллүүд өнгөрсөн арваннэгдүгээр сарын 30-нд гарын үсэг зурсан юм.

Тэгвэл оюутны сургалтын төлбөрийн зээлийг Капитран болон Голомт банкуудаар олгож эхэлжээ.

Энэхүү зээлийг улсын төсвөөс эргэн төлөгдөх хэлбэрээр олгож байгаа учир 4-5 жилийн дараа гэхэд Оюутны хөгжлийн зээлийн сан бүрдэнэ гэж тооцоолсон байна. Мөн хоёр болон түүнээс дээш хүүхэд нь зэрэг суралцаж буй өрхийн нэг хүүхдэд олгох сургалтын төлбөрийн буцалтгүй тусламжийг 1,500 орчим оюутанд олгох тооцоо гаргажээ.

Хэрэв оюутны хөгжлийн зээлд хамрагдсан бол тухайн оюутан үндэсний тэтгэлэг буюу 70000 авах боломжгүй.

Зээлд хамрагдахын тулд ямар бичиг баримтууд бүрдүүлэх вэ?

ЗЭЭЛИЙН ТӨРӨЛ

1. Хүү бууруулах зээл /цалин, тэтгэвэрийн зээлийн дуусах хугацаа /
2. Богино хугацаатай зээл /1 жил /
3. Урт хугацаатай зээл 110 жил /

ЗЭЭЛД ХАМРАГДАХ ОЮУТАН ДАРААХ ЕРӨНХИЙ ШААРДЛАГЫГ ХАНГАСАН БАЙНА

• Магадлан итгэмжлэгдсэн сургуульд зохих журмын дагуу элссэн батламжтай байх;
• Боловсролын нэгдсэн мэдээллийн санд бүртгэлтэй байх;
• Зээлийн үндсэн зээлдэгч нь оюутан, хамтран зээлдэгч нь оюутны гэр бүлийн гишүүн байх;

ХҮҮ БУУРУУЛАХ БОЛОН БОГИНО ХУГАЦААТАЙ ЗЭЭЛД ХАМРАГДАХ ОЮУТАН ДАРААХ НЭМЭЛТ ШААРДЛАГЫГ ХАНГАСАН БАЙНА

• Шинээр элсэн орсон оюутны хувьд тухайн сургуулийн хөтөлбөрт элсэх журамд заасан хичээлийн элсэлтийн ерөнхий шалгалтын оноо нь 400 буюу түүнээс дээш, бусад оюутны хувьд сурлагын голч дүн нь 2.0 болон түүнээс дээш байх;
• Сургуулийн сургалтын төлбөр төлсөн баримтын хуулбар /эх хувиар/;

УРТ ХУГАЦААТАЙ ЗЭЭЛД ХАМРАГДАХ ОЮУТАН ДАРААХ НЭМЭЛТ ШААРДЛАГЫГ ХАНГАСАН БАЙНА

• Их, дээд сургууль төгссөнөөс хойш 4-6 жил хүртэл хугацаанд эргэн төлөх.
• Зээлийн эргэн төлөлт нь оюутны ирээдүйн орлогод суурилах.
• Зээлийн хүүгийн төлбөрийг зээл авсан хугацаанаас хойш cap бүр, үндсэн төлбөрийг сургууль төгссөнөөс хойш 1 жилийн дараагаас эхлэн 3-5 жилийн хугацаанд төлөх.
• Зээлийн давтамж нь үндсэн сургалтын 4-6 жилийн хугацаанд жилд 2 хүртэлх удаа байж болно.
• Шинээр элсэгчдийн хувьд тухайн сургуулийн хөтөлбөрт элсэх журамд заасан хичээлийн элсэлтийн ерөнхий шалгалтын оноо 650 буюу түүнээс дээш, тэргүүлэх ач холбогдолтой мэргэжлийн чиглэлээр суралцаж байгаа оюутны хувьд сурлагын голч дүн нь 2.3, бусад оюутны хувьд сурлагын голч дүн нь 3.0 болон түүнээс дээш байх.

ЗЭЭЛД ХАМРАГДАХ ОЮУТНУУД ДАРААХ БИЧИГ БАРИМТЫГ БҮРДҮҮЛНЭ

• Зээл хүссэн өргөдөл
• Иргэний болон оюутны үнэмлэхийн нотариатаар баталгаажуулсан хуулбар
• Сургуулийн сургалтын төлбөрийн нэхэмжлэл/эх хувиар/
• Хамтран зээлдэгч гэр бүлийн гишүүний иргэний үнэмлэхийн нотариатаэр баталгаажуулсан хуулбар
• Сургуульд зохих журмын дагуу элссэнийг гэрчлэх батламжийн нотариатаар баталгаажуулсан хуулбар

Ю.Халиун