Далайн төвшнийг аль далайгаас хэмждэг вэ

Хот суурин газрын өндөрлөгийг тогтоохдоо “Далайн төвшнөөс дээш” гэж тэмдэглэдэгийг уншигч та мэднэ биз. Жишээ нь, нийслэл Улаанбаатар хот 1350 метрт оршдог гэдэг шүү дээ. Тэгвэл эхлэл цэг болгож аваад байгаа тэр далай нь аль далай юм бол гэж бодож үзсэн үү. “Дэлхийн далай бүгд нэг төвшинд байдаг юм чинь адилхан” гэж бодуузай. Улс болгон өндөрлөг газраа тогтоохдоо эхлэл цэгийг аль ойр байгаа далайгаас авдаг. Гэхдээ далайн төвшин байнга нэг хэмжээнд байдаггүй учир хамгийн тогтмол байх үеийнх нь хэмжээг авдаг ажээ. Тухайлбал, ОХУ болон ТУХН-ы орнууд Балтийн тэнгисийн Кронштадт орчмын 1825-1839 оны төвшинг “0” цэг болгодог бол Их Британи Ньюлин хотын харалдаа Ла Маншийн хоолойн 1915, 1921 оны төвшингөөс тооцдог аж. Харин Европын бусад улс болон Африкийн орнууд Марселийн эргийн 1885-1897 оны төвшингөөс өндөрлөг газраа тооцож тогтоодог байна. Эндхийн усны төвшин сүүлийн 130 жилийн хугацаанд 16 см-ээр нэмэгджээ.