Дуучин Э.Минжинсор: Би Америкт дунджаас дээгүүр амьдралтай байсан

Эх орондоо бүрмөсөн ирээд байгаа дуучин Э.Минжинсор ихэр охидтойгоо зугаалан, рок попын уран бүтээлчидтэй халуун дотноор уулзаж учирч яваа. “Спайк” хамтлаг нь тарсны дараа бие даасан уран бүтээл хийгээд олигтой амжилт олоогүй дуучин бүсгүй Америкт олон жил амьдарсан билээ. Грек залуутай хамт амьдарч, ихэр охидын ээж болсон Э.Минжинсор нэгэн хөгжмийн студид гэрээт уран бүтээлчээр ажиллаж, хувийн уран бүтээлээ таслаагүй хэмээн ярьдаг.

Гэвч гэр бүлийн амьдрал нь бүтэлгүйтэж, хөгжмийн студийнхэн гэрээгээ цуцалсны дараа тэрбээр охидынхоо төлөө зүтгэж, борви бохисхийлгүй ажиллах болсон гэдэг. Өдгөө дунд сургуулийн босго алхаад байгаа ихэр охид нь хэдийнэ биеэ дааж, ээжийгээ тулж түших болсон тул ийн эх орондоо ирэхээр шийдсэн гэх. Харин дуучин бүсгүйг харь оронд зовж зүдэрсэндээ нутгаа зорьсон гэж элдвээр ярьж бичиж буй талаар сонсоод Э.Минжинсор “Америкт найман жил болоод ирсэний дараа миний тухай гарсан мэдээллийн дор комментууд их байдаг байлаа. Сайхан коммент үлдээсэн хүмүүст би талархаж бас бахархдаг. Харин намайг Америкт хэцүү байсан болоод л ирээ биз, их царай алдсан байна гэх мэт комментууд үлдээгчдэд хандаж хэлэхэд би Америкт дунджаас дээгүүр амьдралтай байсан. Дэлхийн аль ч өнцөгт биднийг ивээл ерөөл дагадаг болохыг биеэрээ мэдэрсэн.

Эх орон маань намайг өлгийдөж авсан болохоор эх орондоо амьдарья гэсэн хувь хүний сонголт. Хүүхдүүдээ Монголыг хайрлах сэтгэлтэй болгоё, аавтайгаа уулзая гэж ирсэн. Хүүхдүүдээ анхаараад учиргүй өөрийнхөө өнгө үзэмж гэж гүйгээгүй нь үнэн. Тодорхой хэмжээгээр өөрийгөө золиосолсон гэх үү дээ. Гэвч өөртөө таалагдсаар байсан. Одоо ч байна. Тиймээс бусдын галыг бөхөөх гэж оролдохоосоо өмнө би юу хийв ээ гэж өөрөөсөө асуугаарай” хэмээн бухимдсан сэтгэлээ илэрхийлж байжээ.