Учраа таарсан Хакухо, Тэрүнофүжи нарын хэн нь ялах вэ

Мэргэжлийн сүмогийн тавдугаар сарын тэмцээн буюу Нацү башё Токио хотноо үргэлжилж байна. Одоогоор башёг ёкозүна Хакүхо М.Даваажаргал, маэгашира Кайсей нар 9 даваа 1 унаатай тэргүүлж байгаа бол тэдний ард озэки цолны болзол сонсоод байгаа сэкивакэ Тэрүнофүжи Г.Ган-Эрдэнэ,маэгашира Кёкүшүхо Т.Эрдэнэбаатар, озэки Кисеносато, маэгашира Такаясү нарын дөрвөн бөх 8 даваа 2 унаатай нэхэж явна.

Тэргүүлэгчдийн эгнээнд байсан ёкозүна Харүмафүжи Д.Бямбадорж өчигдрийн барилдаанд маэгашира Гагамарюү өвдөг шороодсоноор хоёр дараалсан унаа авч 7 даваа 3 унаатай болж ухарсан юм.

Тэгвэл 11 дэх өдөр буюу өнөөдрийн барилдаан сонирхолтой болно. Өнгөрсөн башёд хамгийн ихээр олны анхаарал татсан барилдаан бол яах аргагүй Хакүхо М.Даваажаргалыг Тэрүнофүжи Г.Ган-Эрдэнэ унагаж даваа унаа тэнцүү болж байсан барилдаан байлаа.

Тэгвэл өнөөдөр тэд хоорондоо учраа таараад байгаа юм. Мөн л нэг давааны зөрүүтэй башёг хошуучилж байгаа Хакүхо М.Даваажаргалыг Тэрүнофүжи Г.Ган-Эрдэнэ дахин унагах уу, их аварга давж өнгөрсөн башёд шороодсон хариугаа авах уу гэдэг асуултын хариуг бид өнөөдөр харна.