Жозе Моуриньо: Иванович бол бидний нууц зэвсэг

Аваргуудын лигийн хасагдах шатны тоглолтууд эхэлсэн. Шөвгийн 16-д Английн “Челси” клуб Францийн “ПСЖ” клубын талбайд зочилж, 1:1-ээр тэнцсэн билээ. Энэхүү тоглолтын дараа “Челси”-гийн дасгалжуулагч Жозе Моуриньо өөрийн үзэл бодлоо илэрхийлжээ.

Тэрбээр “Эхний хагаст бид илүү байсан. Өрсөлдөгч баг маань бидэнд илүү бөмбөг эзэмшүүлж, өөрсдөө хамгаалалтаа сайн хийж байлаа.Тэдний зүгээс дарамт ирээгүй болохоор амар байсан гэхэд болно. Харин хоёрдугаар хагаст бүх зүйл өөрчлөгдсөн. Яагаад гэвэл тэд довтлох шаардлагатай болсон.Тиймдээ ч завсарлагааны дараа хаалга руу чиглэсэн олон аюултай довтолгоо өрнүүлсэн.

Эхний хагасын байдлаар бид хожсон байсан ч тэд тэнцээ авах эрхтэй гэж би бодож байна. Гэсэн хэдий ч ялалт манайд ойрхон байсан. Өрсөлдөгч маань асар хүчтэй байна. Тэдний довтолгооны шугамд Ибрагимович, Кавани, Лавеззи, Пасторе гээд шилдгүүд байна шүү дээ.

Гэхдээ Куртуа өнөөдөр үнэхээр сайн байлаа. Мөн бидэнд зорилгодоо хүрэхийн тулд гоол хэрэгтэй. Тэр гоолыг Иванович орууллаа. Ивановч бол манай багийн нууц зэвсэг. Түүний оруулсан гоолууд онооны үнэ цэнэтэй байдаг. “Ливерпүүл”, “ПСЖ”-гийн эсрэг гоолдсон гоолуудыг санахад л хангалттай” хэмээн ярьжээ.

Эх сурвалж: http://www.mminfo.mn