Алдарт Кока кола ундааны нууц жорыг зарна гэжээ

Америкийн иргэн Клифф Клуж Кока Кола ундааны нууц жорыг олж авсан тухайгаа “eBay” сайтад бичиж, зарна хэмээн мэдэгджээ.Тэрбээр нэгэн алдартай химичийн гэр орны эд зүйлсийг зарж байсан дуудлага худалдаанд оролцож байхдаа 1943 оны үеийн нэгэн бичиг баримт бүхий хайрцгийг худалдаж авсан гэнэ. Тухайн үедээ тэрхүү химич нь Кока Кола компанийн захиалгаар уг ундааны нууц жорыг бүтээхэд оролцож байжээ. Клифф Клуж Кока Кола ундааны нууц жорыг 5 сая доллараас эхлэн дуудлага худалдаагаар зарахаар бэлтгээд байна. Ундааны нууц жорыг дуудлага худалдаанд орохоос нь өмнө мэдэх гэсэн хүмүүс ямар ч амжилт олохгүй гэнэ. Учир нь Клифф Клуж уг гар бичмэлийн зургийг интернетэд тавихдаа хамгийн чухал бүрэлдэхүүн хэсгүүдийн нэрсийг нь арилгасан ажээ. Кока Кола компанийн төлөөлөгч мэдэгдэхдээ “Энэхүү томъёо нь уг компанийн жинхэнэ үйлдвэрлэлд хэрэглэдэг жортой зарим талаар нийцэж магадгүй боловч жинхэнэ жор биш” гэжээ. Кока Кола компани өөрийн алдарт ундааны жорыг 19-р зууны эцсээс эхлэн чанд нууцалсаар ирсэн бөгөөд компанийн нууц жорыг банкны сейфэнд хадгалдаг,сейфний түлхүүрийг ердөө 3 хүн эзэмших эрхтэй гэнэ.

Б.Цэлмэг