"IPhone”, “Android” утаснууд ТикТок ашиглах боломжгүй болно

АНУ-ын Харилцаа холбооны хорооноос “Apple”, “Google” компаниудад уриалга хүргүүлсэн. Тодруулбал, Хятад эзэнтэй ТикТок компани хэрэглэгчийн мэдээлэлд нэвтэрч буй тул энэ үйлдлийг нь зогсоох тухай уриалга юм.

Харилцаа холбооны хорооны комиссар Брендан Карр технологийн акулуудад илгээсэн захидалдаа ТикТокийг яагаад өөрсдийн програмаасаа устгах шаардлагатайг илэрхийлсэн. ТикТок үндэсний аюулгүй байдалд заналхийлж буй тухай тайлан өнгөрсөн долоо хоногт гарчээ. Уг тайланг Брендан Карр эш татаад, долдугаар сарын 8 гэхэд ТикТокийг устга, үгүй бол яагаад устгаагүйгээ тайлбарлахыг хүсчээ.

ТикТокийн хятад ажилчид АНУ-ийн хэрэглэгчийн мэдээлэлд удаа дараалан нэвтэрч байсныг уг тайланд дурдсан байв. Тухайлбал, 2020 онд гуравдугаар сард ТикТокоор дамжуулан хэрэглэгчийн нууц үг, криптовалютын цахим түрийвчний хаяг, хувийн зурвас зэрэг нууц мэдээлэлд нэвтэрч байсныг илрүүлсэн байна. “Бээжин ТикТокоор дамжуулан их хэмжээний мэдээлэл цуглуулж, нууц мэдээлэлд хяналтгүй нэвтэрч байгаа нь үндэсний аюулгүй байдалд эрсдэл учруулж байна” гэж Карр захидалдаа бичсэн байна.

ТикТок АНУ-ын нууц мэдээллийг хадгалах тухай мэдэгдлийг үл харгалзан бүх зүйлд хандах боломжтой мастер админтай байсныг мөн илрүүлжээ.

АНУ-ын ерөнхийлөгч асан Дональд Трамп улсдаа ТикТок болон “Wechat”-ыг хориглох тушаалд гарын үсэг зурж байсан. Гэтэл Жо Байден өнгөрсөн жил энэ захирамжийг хүчингүй болгосон ажээ.