У.Гретцкийн дээд амжилтыг А.Овечкин давтав

        "Вашингтон Кэпиталз" талбайдаа "Даллас Старз"-ад 2:3-аар хожигдлоо. Тоглолтын 25 дахь минутад нийслэлийн багийн ахлагч, 36 настай Александр Овечкин өрсөлдөгчийнхөө хаалганд шайб оруулжээ. Энэ нь "Агуу Алекс"-ийн энэ улиралд оруулж буй 40 дэх шайб бөгөөд домогт Уэйн Гретцкийн 12 улиралд 40 болон түүнээс олон шайб оруулсан дээд амжилтыг давтсан аж. 62 тоглолтод 40 шайб оруулж, 36 удаа оновчтой дамжуулсан орос хоккейчин 770 шайбаар бүх цаг үеийн мэргэн буучдын жагсаалтын гуравт бичигдэж буй. Түүний урд У.Гретцки 894, Г.Хоу 801 шайбаар бичигдэж байгаа билээ.