Ц.Туваан:Тэтгэврийн зээлтэй бурхны оронд очсон ахмадуудын зээлийг нэг удаа тэглэх хуулийн төсөл юм

УИХ-ын гишүүн Ц.Туваан өнөөдөр /2021.12.15/ Нас барсан өндөр насны тэтгэврийн зээл авагчийн тэтгэврийн зээлийг чөлөөлөх тухай хуулийн төслийг санаачилж, өргөн барьж байгаа талаараа мэдээлэл хийлээ.

Тэрбээр "Өнөөдрийн байдлаар 450 мянган тэтгэвэр авагч байна. Тэднээс хорвоогийн жамаар ертөнцийн мөнх бусыг үзүүлсэн бол зээлийг нь ар гэрийнхэн нь төлдөг. Талийгчаа алдсан, ажил явдалтай үед зээлийг нь төлдөг, нас барсны гэрчилгээ авахад хүртэл зээлийг нь төлөх шаардлагатай болдог асуудал байна" хэмээн мэдээллийнхээ эхэнд тодотголоо. 

Түүнчлэн "Энэ бол анх удаа хийгдэж байгаа асуудал биш. Ерөнхийлөгч асан Х.Баттулгын санаачилгаар тэтгэврийн зээлийг тэглэж байсан. Тэтгэврийн зээлгүй байсан тэтгэвэр авагчдад нэг сая хүртэлх төгрөгийн мөнгөн дэмжлэг үзүүлж байсан. Өнөөдөр бүрэн тэтгэврийн доод хэмжээ 350 мянган төгрөг байна. Бүх бараа, бүтээгдэхүүний үнэ нэмэгдэж байна. Тэтгэвэр авагчдын тэтгэвэр нь хаанаа ч хүрэлцэхгүй байна. Судалгаагаар 900 гаруй мянган хүн ядуу байна. Тэдний ихэнх нь тэтгэвэр авагчид байна. Тиймээс энэ хуулийг санаачилж, өргөн барьж байна. Өнөөдөр тэтгэврийг нь тэглэснээс хойш 90 орчим тэрбум төгрөгийн зээл авсан байна. Тэдний зарим нь тэтгэврийн зээлтэй бурхны оронд очсон. Тиймээс тэдний тэтгэврийн зээлийг нэг удаа тэглэх хуулийн төсөл юм" гэлээ.