Аваргуудын лигийн 2021-2022 оны улирлын хасагдах шатны сугалаа боллоо. Сугалаа том багууд нь дундаж багуудаа амлаж авсан юм шиг л боллоо.

Хамгийн сонирхолтой нь гэвэл Францын "ПСЖ" болон Английн "Манчестер Юнайтед" багууд хоорондоо учраа таарав. Үндсэндээ Месси болон Роналдо нар бие биеийнхээ эсрэг тоглох нь.

Португаль болон Аргентин хөлбөмбөгчид хамгийн сүүлд 2020 оны 12 дугаар сард учраа таарсан. "Ювентус" клуб тэр тоглолтод "Барселона"-г 3:0-ээр хожиход Роналдо дубль хийж байсан.

Тэгвэл энэ хоёр агуу хөлбөмбөгч клуб болон шигшээ багийн түвшинд нийтдээ 36 удаа хоорондоо таарч тоглосон. Мессигийн тоглосон баг 16, Роналдогийн тоглосон баг 11 удаа хожсон. Үлдсэн 9 удаад нь тэнцэж байжээ. Эдгээр тоглолтуудад Месси 22, Роналдо 21 гоол оруулсан.

Хоёр багийн эхний тоглолт Парист болно. Аваргуудын лигийн шөвгийн 16-гийн эхний тоглолтууд 2022 оны хоёрдугаар сарын 15, 16, 22, 23-ны өдрүүдэд болох юм. Харин хариу тоглолтууд гуравдугаар сарын 8, 9, 15, 16-ны өдрүүдэд болно.