Норвегийн Ослод болж байгаа чөлөөт бөхийн ДАШТ-д өнөөдөр эмэгтэй 50 кг-ын жингийн медальтнууд тодорлоо.

Энэ жинд өрсөлдсөн Долгоржавын Отгонжаргал өнөөдөр дагах барилдаанд Беларусын Наталья Варакинаг цэвэр ялсан.

Хүрэл медалийн төлөө дэлхийн АШТ-ий хос мөнгөн медальт, Европын аваргын 3 медальтай, хоёр олимпод оролцсон, хашир туршлагатай тамирчин Румыний Алина Вуктэй барилдлаа.

Хашир бөх барилдааны эхэнд давамгайлах гэж оролдсон ч Д.Отгонжаргал ирийг нь дор нь дарсан. Мушгихад нь хариу мэх хийж, ард нь гараад 2 оноо, 2 эргүүлээд 4 оноо, шууд 6:0 тэргүүлж эхэллээ. Хоёрдугаар үе эхлээд удаагүй байхад нэмж оноо авснаар 10:0 оноогоор цэвэр ялж, дэлхийн аваргын хүрэл медальт боллоо. Энэ удаагийн тэмцээний гол нэгэн од нь Д.Отгонжаргал байлаа. Үнэхээр сайн барилдлаа.