Кубад эсэргүүцлийн ажиллагааны үеэр нэг хүн амь үрэгджээ

Өнгөрсөн ням гарагийн жагсаал цуглааны үеэр нэг хүн амь үрэгдсэнийг кубийн коммунист намын “Гранма” сонинд мэдээлсэн байна. Хэв журам сахиулагчдаас бас хэд хэдэн хүн бэртэж гэмтжээ. “Мөргөлдөөн болох үеэр нэлээд хэдэн иргэнийг саатуулж, зарим хүн, түүний дотор хууль сахиулах байгууллагын ажилтнууд шархаджээ. Эмх замбараагүй явдалд оролцсон 36 настай Диубис Лауренсио Техеда гэгч амь үрэгдсэн байна. Өмнө нь тэр хулгайлах, танхайрах хэргээр ял эдлэж байжээ” гэж сонинд онцлон тэмдэглэсэн байна. Сонинд бичсэнээр, Гавана хотоос зүүн урагш орших Арройо-Наранхо хотод цагдаа нар, одоогийн эрх баригчдын талынхан болон эсэргүүцэгчдийн хооронд мөргөлдөөн болжээ.

Эсэргүүцэл илэрхийлэгчдийг эндхийн цагдаагийн анги руу явж байх замд нь зогсоож, улмаар тэд хууль сахиулах байгууллагын ажилтнууд болон хүмүүс рүү чулуу, саваа шидэж, хүйтэн зэвсэг хэрэглэсэн байна. Түүнчилэн эсэргүүцэгчид байшин барилга түйвээж, чингэлгүүд шатааж, цахилгаан дамжуулах шугам гэмтээснийг “Гранма” сонинд мэдээлжээ.

Ням гарагт Кубийн олон хотод сүүлийн жилүүдэд анх удаа олон хүн оролцсон эсэргүүцлийн ажиллагаа болсон юм. Жагсагчдын зургаас үзвэл, энэ арга хэмжээнд олон мянган хүн оролцсон байна. Эсэргүүцэл илэрхийлэгчид “чөлөөт сонгууль явуулах”, нийгмийн асуудлууд шийдвэрлэхийг шаардаж байжээ. Ерөнхийлөгчийг уриалсны дараа засгийн газар болон коммунистуудын талынхан гудамжинд гарч, өдөөн хатгалгад няцаалт өгөхөөр хотуудад мөн жагсаал зохион байгуулсан байна. Эсэргүүцлээ тайван замаар илэрхийлж, ирээдүйгээ чөлөөтэй тодорхойлох Кубийн ард түмнийг АНУ дэмжиж байна гэж АНУ-ын ерөнхийлөгч Ж.Байдан даваа гарагт мэдэгдсэн юм.

Б.Атар