В.Путин Э.Раисид баяр хүргэж, цахилгаан илгээв

   "ОХУ-ын ерөнхийлөгч В.Путин Ираны ерөнхийлөгчийн сонгуульд ялсан Эбрахим Раисид баярын цахилгаан илгээлээ" гэж Кремлийн хэвлэл мэдээллийн алба бямба гарагт мэдээллээ. Уг цахилгаанд "Манай хоёр улс уламжлалт найрсаг, сайн хөршийн харилцаатай байдаг. Таны энэхүү өндөр албан тушаалд томилогдсон явдал хоёр орны олон талт бүтээлч хамтын ажиллагаа, цаашлаад олон улсын харилцааны түншлэлийн цаашдын хөгжилд хувь нэмэр оруулна гэж найдаж байна" хэмээн дурджээ. Мөн "Энэ нь ОХУ, Ираны ард түмний ашиг сонирхлыг бүрэн хангаж, бүс нутгийн аюулгүй байдал, тогтвортой байдлыг бэхжүүлэхтэй нийцэж байна" гэж онцолсон аж.