Агнесса фон Куровски бол Эрнест Хэмингуэйн зүрхийг зүссэн бүсгүй. Тэд дэлхийн нэгдүгээр дайны үеэр цэргийн эмнэлэгт танилцжээ. Зохиолч шархдаж, сувилагч бүсгүй асарч байв. Тэнд л хайрын гал бадарсан байна. Дэргэдээс нь холддоггүй хөөрхөн сувилагчид сэтгэлээ алдаж орхисон Хэмингуэй 19 нас хүрсэн өдрөө гэрлэх санал тавьсан боловч бүсгүй татгалзсан нь цочир явдал болжээ.

Залуу эр солиортлоо хардаж байлаа. Найзуудтайгаа аяллаар явна гэхэд нь эмнэлгийн өрөөгөөр нэг чарлан хашхичиж, явахаа болихыг шаардан цамнаснаар Эрнест хэцүүхэн зан авираа таниулж орхижээ.

1918 онд Агнессаг Миланаас Флоренц руу шилжүүлэх болоход хайртай бүсгүйгээ алдахаас айсан Хэмингуэй ахин гэрлэх санал тавьж хоргоов. Гэвч Агнесса хариу хэлсэнгүй. Ингээд алс холыг зорьсноор тэд захидлаар харилцдаг болж, Агнесса хамтдаа өнгөрүүлсэн цаг хугацаагаа үргэлж санадаг гэж нэгэн захиандаа бичсэн удаатай.

Төдий их удалгүй ахин уулзахдаа хоёрхон цаг цуг байсан нь сүүлчийн учрал байжээ.

1919 оны нэгдүгээр сард Эрнест Хэмингуэй эмнэлгээс гарч, Америк руугаа буцав. Гэвч тэдний захидал харилцаа тасарсангүй. Халуун дулаан хайрын захиагаар Хэмингуэй Агнессаг ахиад гуйлаа. Гэтэл бүсгүй нэгэн захидалдаа "байнга над руу бичээд байх хэрэггүй" гэжээ.

1919 оны гуравдугаар сард Куровски италийн язгууртантай гэрлэх болсноо дуулгав. Хэмингуэй золтой амиа егүүтгэсэнгүй.

Тэрээр Агнессагаас хойш олон арван хүүхэнтэй учир ургуулж явсан хэрнээ ахиж хэнийг ч гал халуунаар хайрлаж үзээгүй гэдэг. Зүрх сэтгэлд нь мөнхөд үлдсэн түүндээ "Зэр зэвсэг минь баяртай" романаар хөшөө босгосон юм.

Зураг дээр: Эрнест Хэмингуэй, Агнесса фон Куровски. Нэгдүгээр дайны үед цэргийн эмнэлэгт.