АНУ-д хоёр өдөр дараалан 100 мянгаас дээш тооны хүн халдвар авлаа

АНУ-д пүрэв гарагт коронавируст халдварын 123,085 тохиолдол шинээр бүртгэгдсэн нь тус улсын хувьд төдийгүй дэлхийн хэмжээнд хамгийн өндөр үзүүлэлт болжээ.

Өмнөх өдөр нь мөн 100 мянга гаруй тохиолдол бүртгэгдэж байсан бол энэ удаа 20 мянга орчмоор ахиулсан байна.

Өнгөрсөн есдүгээр сард Энэтхэгт 24 цагийн дотор 97,894 халдварын тохиолдол бүртгэгдсэн нь дэлхийн хэмжээний хамгийн өндөр үзүүлэлт болж байжээ. 

Өнөөдрийн байдлаар тус улсад Covid-19 халдварын батлагдсан тохиолдол нийтдээ 9.6 сая гаруй болж, 235,000 орчим өвчтөн нас бараад байгаа нь мөн дэлхийд хамгийн өндөр үзүүлэлт юм.

Нөхцөл байдал энэ хэвээр үргэлжилбэл АНУ нь дөрвөн өдрийн дараа 10 сая халдварын тохиолдолтой дэлхийн анхны улс болох гэж байна.