Вьетнамд үерийн улмаас 105 хүн нас бараад байна

  Тус улсын төв хэсэгт үерийн улмаас амиа алдагсдын тоо 105-д хүрч,  27 хүн сураггүй алга болсон тухай мягмар гарагт Гамшгаас хамгаалах үндэсний зохицуулах хорооноос мэдээллээ. Төвийн бүс нутагт хоёр долоо хоногийн турш орсон хүчтэй аадар хөрсний нуралт үүсгэсэн төдийгүй зургаан муж үерт автжээ. Мөн усны төвшин олон газар 2-3 метрт хүрсэн аж. Уг хорооны мэдээлснээр 260 мянгаад тариачны аж ахуй үерт нэрвэгдэж, орон сууцны 52,9 мянга гаруй барилга усанд автасны 24,7 мянга орчим нь ноцтой эвдэрч, бүрэн сүйдсэн байна. Түүнчлэн үер хөдөө аж ахуйн 107500 га газрыг сүйтгэж, олон суурин газрын цахилгаан дамжуулах шугам, харилцаа холбоо эвдрэн, төвийн бүсийн мужуудын авто болон хурдны зам усанд автав. Олон газар нутгийг гадаад ертөнцөөс тасалсан нь дамжиггүй. Даваа гарагт Ханойд болсон төвийн бүсийн нөхцөл байдлын талаарх уулзалтын үеэр ерөнхий сайд Нгуен Суан Фук гамшгийн хор уршгийг арилгах ажлыг түргэсгэж, гамшигт нэрвэгдсэн муж, хотуудад санхүүгийн хамгийн их дэмжлэг үзүүлэхийг шаарджээ. Бас 5000 тонн будааг гамшигт нэрвэгдсэн нутгийн оршин суугчдад шилжүүлэх үндэсний нөөцөөс хуваарилсан юм.