АНУ-ын ерөнхийлөгч Дональд Трамп коронавирусийн халдвар авчээ

АНУ-ын ерөнхийлөгчийн шадар туслах Хоуп Хиксээс коронавирусийн халдвар илэрсний дараа Дональд Трамп, тэргүүн хатагтай Меланиа нараас шинжилгээ авсан тухай саяхан мэдээлсэн.

Тэгвэл саяхан Трамп өөрийн твиттер хуудсанд коронавирусийн халдвар авч, тусгаарлагдах болсноо зарлалаа. “Тэргүүн хатагтай бид хоёр коронавирусийн халдвар авсан нь батлагдлаа. Биднийг тусгаарлах, эмчлэх ажил даруй эхэлнэ. Бид үүнийг хамтдаа давж гарах болно” гэж тэрээр бичсэн байна.

Хоуп Хикс нь ерөнхийлөгчийн олон нийттэй харилцах асуудлыг хариуцдаг бөгөөд сүүлийн үед сонгуулийн ажлаар байнга онгоцонд хамт аялж байсан юм. Сүүлд тэрээр мягмар гарагт болсон халз мэтгэлцээнд Трампыг дагалдаж, лхагва гарагт Миннесотагийн сонгогчидтой хийх уулзалтад нь хамт байлцжээ.