Израйль улсад дахин хөл хорио тогтоолоо

Коронавирусийн халдвар нэмэгдсэнтэй холбогдуулан Израйль улс хоёр дахь удаагаа хөл хорионы дэглэмд шилжлээ.

Шинэ дэглэм баасан гарагт эхэлж, гурван долоо хоног үргэлжлэх аж. 9 сая орчим хүн амтай Израйль улсад сүүлийн байдлаар халдварын 153,000 гаруй тохиолдол бүртгэгдэж, 1108 хүн нас бараад буй. Сүүлийн үед нэг өдөрт илрэх халдварын тохиолдол нь 4000 хүрч өссөн тул хөл хорио тогтоох хэрэгтэй болсон байна.

Израйльд өмнө нь энэ оны гуравдугаар сарын сүүлээс тавдугаар сарын эхэн үе хүртэл хөл хорио тогтоож байсан юм. Шинэ хоригийн хүрээнд дотоод орчинд 10-аас дээш тооны хүн, гадаад орчинд 20-оос дээш тооны хүн цугларахыг хориглож, сургууль, худалдааны төвүүдийг хаажээ. Ажилд явахаас бусад зорилгоор гэрээсээ 500 метрээс хол явахыг хориглосон байна.

Зөвхөн хүнсний дэлгүүрүүд, эмийн сангууд нээлттэй байхаар зохицуулжээ. Хөл хорионы үеэр иудейн шашны томоохон баяр давхцаж байгаа нь зарим сүсэгтнүүдийг бухимдуулж байна. Есдүгээр сарын 27-ны өдөр нь жүүдүүдийн цаг тооны бичгээр жилийн хамгийн ариун өдөр юм. Энэ өдрийг жүүдүүд гэр бүл, төрөл төрөгсдөөрөө цугларч тэмдэглэдэг аж. 

Израйлийн ерөнхий сайд Бенжамин Нетаньяху “Энэ бол бидний мэддэг баяр биш байх болно. Энэ удаа бид олуулаа цугларч тэмдэглэх боломжгүй байх нь” гэж мэдэгджээ. Хоёр дахь хөл хорионы дэглэм Израйлийн эдийн засагт 6.5 тэрбум шекелийн ($1.88 тэрбум) хохирол учруулахаар байгааг сангийн яам нь мэдээлсэн байна.