World Masters 2019: Г.Хэрлэн мөнгө, Ё.Басхүү хүрэл медаль хүртлээ

Хятадын Чиндао хотноо жүдо бөхийн мастеруудын тэмцээн болж байгаа билээ. Өнөөдөр манайхаас эрэгтэй 66 кг-д хоёр бөх гарч барилдаж, хоёулаа медаль хүртлээ. Энэ жилийн дэлхийн аваргаар томчуудыг нурааж, шуугиулж чадсан Ё.Басхүү хүрэл медалийн төлөө  Израйлийн Брауч Шмайловыг нэмэлт цагт базари үнэлгээгээр ялж, медалийн тавцанд зогслоо.

Тэгвэл Г.Хэрлэн урамтай сайхан барилдаж, мөнгөн медаль хүртлээ.  Тэрбээр 2017 онд мастеруудын тэмцээнээс алтан медаль хүртэж байсан юм. Энэ удаад аваргын төлөө Италийн Мануэль Ломбардотай барилдаж, цэвэр ялагдсанаар мөнгөн медаль хүртсэн юм.  

Ийнхүү эхний өдөр манай тамирчид хоёр мөнгө, нэг хүрэл медаль хүртэж, тэмцээнийг урамтай сайхан эхлүүллээ.  Маргааш манайхаас 6 бөх барилдана.