Москвад АНУ-ын дипломат ажилтны тээшнээс мина илрүүлжээ

            Москвагийн Шереметьево нисэх буудлын ажилтнууд АНУ-ын ЭСЯ-ны дипломат ажилтны тээшийг шалгахдаа тэсрэх мина бөмбөгтэй төстэй зүйл илрүүлжээ. Нисэх буудалд хүрэлцэн ирсэн цэргийн мэргэжилтнүүд тээшинд тэсрэх бодисгүй ч тэслэгчтэй мина шидэгчийн бөмбөг байгаа болохыг тогтоосон байна. 

            АНУ-ын дипломат ажилтан томилолтын хугацаа нь дуусан нутаг буцахдаа хувийн цуглуулгадаа зориулан тэсрэх бөмбөггүй хоосон мина авсан тухайгаа өчжээ. Түүний минаг хураан авч дараагийн нислэгээр Нью-Йорк руу саадгүй явуулсан аж.

            Оросын ГХЯ мэдэгдэлд хийхдээ, болсон үйл явдлыг АНУ-ын зүгээс санаатай явуулсан өдөөн хатгалга гээд 2001 оны есдүгээр сарын 11-нд Нью-Йоркт болсон террорист халдлагаас хойш АНУ нислэгийн аюулгүй байдалд онцгой анхаардаг болсон тул дипломат ажилтан тээшиндээ мина авч явах нь ямар үр дүн дагуулахыг сайн ойлгох учиртай гэжээ.

Б.Туг