БНХАУ-д “COVID-19” бүртгэгдэхээс өмнө Ухань хотын вирус судлалын хүрээлэнгийн судлаачид өвдөж, эмнэлэгт хэвтэж байжээ

БНХАУ-ын Ухань хотын вирус судлалын хүрээлэнгийн гурван эрдэмтэн 2019 оны 11 дүгээр сард хүндээр өвджээ. Энэ нь коронавирусийг зохиомлоор үүсгэсэн гэх хувилбар илүү нааштай гэдгийг харуулж байна хэмээн “The Wall Street Journal” сонин Америкийн тагнуулын газрын мэдээллийг эш татан мэдээлжээ.

Тус сонины сэтгүүлчид АНУ-ын тагнуулын газрын олонд дэлгээгүй илтгэлтэй танилцжээ. Уг баримт бичигт агуулагдах мэдээлэл нь халдварт өвчний гарал үүслийг мөрдөн шалгах ажиллагааг илүү өргөн хүрээтэй явуулах уриалгад жинтэй хувь нэмэр оруулах боломжтой гэж “WSJ” сонин мэдээлсэн байна. Коронавирусний халдварт өвчний анхны тохиолдол илрэхээс өмнөх Уханийн вирус судлалын хүрээлэнгийн ажилтнууд 2019 оны намар өвдсөн талаар Хятадын эрх баригчид тайлбар өгөхийг АНУ-ын Төрийн нарийн бичгийн дарга асан Майкл Помпео шаарджээ. Уханийн вирус судлалын хүрээлэнгийн гурван судлаач 2019 оны 11 дүгээр сард хүндээр өвдөж, эмнэлэгт хэвтэн эмчлүүлэхээс өөр аргагүйд хүрчээ. Тийнхүү мэдээлэхдээ “The Wall Street Journal” сонин судлаачдыг коронавирусээр халдварласан хэмээн мэдээлээгүй ч тус өвчин болон улирлын томуугийн шинж тэмдэгтэй зарим талаараа төстэй шинж тэмдгүүд тэдэнд илэрсэн гэдгийг цохон тэмдэглэсэн байна.

Үүний зэрэгцээ цар тахал дэгдэж эхлэхээс өмнөхөн коронавирусийг судалдаг нэгэн багийн гишүүд мөн ижил шинж тэмдэгтэйгээр эмнэлэгт хүргэгдсэн тухай мэдээлэл маш чухал байж болох юм гэдгийг мөн онцлов. Энэ талаар БНХАУ-ын Гадаад хэргийн яамны төлөөлөгч тайлбар өгөхдөө, “АНУ лабораториос вирус алдагдсан талаарх таамаглалыг сөхсөөр байна. Ингэхдээ үнэхээр вирусний гарал үүслийг олж илрүүлэхэд санаа зовнив уу аль эсвэл иймэрхүү байдлаар анхаарлыг өөр зүгт хандуулахыг хичээж байна уу” гэжээ.

АНУ-ын Конгрессын Төлөөлөгчдийн танхимын Бүгд Найрамдах намын гишүүд коронавирусний дэгдэлт үүсэх болсон шалтгааныг өөрсдөө шалгахаар болжээ. Уханийн вирус судлалын хүрээлэнгээс коронавирус алдагдсан гэх хувилбарыг нарийвчлан судлахыг Конгрессын гишүүд шаардсан байна. Харин БНХАУ-ын Гадаад хэргийн яамны албан ёсны төлөөлөгч Хуа Чуньин 3 дугаар сард мэдэгдэхдээ, ДЭМБ АНУ-ын Форт Детрик дэх цэргийн лаборатори болон иймэрхүү өөр бусад улсын байгууллагаас вирус алдагдсан тухай хувилбарыг судлах ёстой гэжээ.

ДЭМБ-ын илтгэл

“COVID-19”-ийн гарал үүслийг олж илрүүлэх зорилготойгоор 1, 2 дугаар сард Хятадад айлчилсан тухай илтгэлдээ олон улсын шинжээчид нэгдсэн дүгнэлтэд хүрч чадаагүй юм. Шинжээчдийн эцсийн дүгнэлтэд дурдсанаар, коронавирус нэг амьтнаас нөгөөд халдаж, дараа нь хүнд халдварласан гэх хувилбарыг хамгийн өндөр магадлалтай гэж үзсэн бол лабораториос тархсан гэх хувилбарыг хамгийн магадлал багатай гэжээ.

Энэ илтгэл нийтлэгдсэний дараа судалгаанд санаа зовниж буйгаа АНУ-аас гадна Австрали, Их Британи, Дани, Израил, Канад, Латви, Литва, Норвег, Словени, Чех, Эстони, БНСУ, Япон илэрхийлжээ. Эдгээр улс судалгааг илт шүүмжлээгүй ч шинжээчдийн ажил мэдэгдэхүйц саатсанаас гадна бүрэн мэдээлэл олж аваагүй гэдгийг цохон тэмдэглэсэн байна.

Эх сурвалж: Монцамэ агентлаг