Т.Акгуль аваргын төлөө шалгарлаа

  Польшийн нийслэл Варшавт бөхийн төрлүүдийн Европын аварга шалгаруулах тэмцээн үргэлжилж байна. Чөлөөт бөхийн 125 кг-д Риогийн олимпын алтан медальт, дэлхийн хошой, Европын зургаан удаагийн аварга, Туркийн Т.Акгуль хүнд бэртлийн дараа дэвжээндээ эргэж ирэн, аваргын төлөө шалгарав. Тэгшитгэлд гол өрсөлдөгч, Риогийн олимпын хүрэл медальт, дэлхийн гурав, Европын хошой аварга, Гүржийн Г.Петриашвилиг 1:6, шөвгийн наймд дэвжээний эзэн орны К.Косциолекийг мөн 1:6, хагас шигшээд Беларусийн Д.Храменковыг 0:4-өөр ялсан 30 настай турк хүчтэн 2019 оны сүүлчээр бэлтгэлийн үед мөрөндөө хүнд гэмтэл авсан билээ. Тэрээр аваргын төлөө ОХУ-ын С.Козыревтэй барилдана.