М.Уранцэцэг Ташкентын Их дуулгын алтан медаль хүртлээ

Дэлхийн аварга, гавьяат тамирчин М.Уранцэцэг Узбекистаны Ташкент хотноо өчигдөр эхэлсэн “Tashkent Grand Slam 2021” Их дуулгын аварга боллоо.  

Олон улсын жүдо бөхийн холбоо /IJF/-ны энэ оны 2 дахь цуврал тэмцээний эмэгтэйчүүдийн 48, 52, 57 кг, эрэгтэйчүүдийн 60, 66 кг жингийн барилдаанууд өнөөдөр явагдаж, жин тус бүрийн шилдгүүд тодорч байна.

М.Уранцэцэг 48 кг-д хэсгийн аваргын төлөө Италийн Франческа Миланиг, хагас шигшээд Сербийн Андре Стоядиновыг ялснаар мөнгөн медалийн болзол ханган аваргын төлөө Японы жүдоч Нацүми Цүнодатай хүч үзэн алтан медалийн эзэн болов. 

Энэ үдэш ОУХМ Л.Сосорбарам эмэгтэйчүүдийн 52 кг-д аваргын алтан медалийн төлөө Японы Юта Абэтэй барилдах бол эрэгтэйчүүдийн 66 кг-д ОУХМ Ё.Басхүү  аваргын төлөө БНСУ-ын жүдоч Ан Баултай хүчээ сорино.