Диего Марадона таалал төгсөв

1986 оны дэлхийн хөлбөмбөгийн аварга шалгаруулах тэмцээний аварга Аргентины Диего Марадона 61 насандаа таалал төгссөнийг телевизийн TN суваг мэдээлжээ.

 TN сувгийн мэдээлснээр тэрээр шинжилгээ хийлгэхээр аравдугаар сарын 30-нд эмнэлэгт хэвтжээ. Марадона тархиндаа мэс засал хийлгэсэн нь тодорхой болсон юм. Ингээд арваннэгдүгээр сарын 12-нд түүнийг эмнэлгээс гаргасан байна.

  “Perfil” сонинд бичсэнээр, түүний зүрх гэнэт зогсжээ. Марадонагийн даралт эрс  бууурч, энэ үед төрөл төрөгсөд нь түүний дэргэд байсан аж. Түргэний эмч нар хөлбөмбөгчний амь насыг аварч чадсангүй гэж “Perfil” сонинд бичжээ. Марадонаг таалал төгссөнтэй холбогдуулан Аргентины ерөнхийлөгч тус оронд гурван өдрийн гашуудал зарласан байна.

 Диего Армандо Марадона 1960 оны аравдугаар сарын 30-нд Буэнос-Айрес хотын захын Виллья Фиоридод мэндэлжээ. Гурван настай байхдаа хөлбөмбөгийн бөмбөг бэлгэнд авч, тэр цагаас хойш бөмбөгөөр тоглон өдрийг өнгөрүүлдэг байсан ажээ. Тэрээр 10 настайдаа хөлбөмбөгийн "Архентинос Хуниорс" клубийн идэрчүүдийн секц болох "Лос Себольитас" багт орсон бөгөөд уг багт голдуу 16 нас хүрээгүй хүүхдүүд тоглодог байжээ. 1977 онд Диего үндэсний шигшээ багийн бүрэлдэхүүнд тоглож эхэлсэн байна.

 1981 онд Аргентины “Бока Хуниорс” баг Марадонаг 3,6 сая ам.доллараар авчээ. ДАШТ-ий дараа 1982 онд тэр “Барселона” клубтэй (Испани)  гаднын анхны гэрээ байгуулсан байна. Гэрээний өртөг  1,2 сая песо (8 сая ам. доллар) байсан нь тэр үедээ хөлбөмбөгийн түүхэнд хамгийн үнэтэй хөлбөмбөгчин болжээ. Энэ клубт байх хугацаандаа тэрээр 73 тэмцээнд тоглож, эсрэг талын хаалганд 45 бөмбөг оруулсан юм. “Барселона” клубийн бүрэлдэхүүнд тоглож байхдаа Марадона Испанийн цом болон Испанийн лигийн цомын эзэн болсон байна.

 1984 онд Марадона Италийн “Наполи” клубт шилжжээ. Тэрээр Италид (1984-1991) хөлбөмбөгт хамгийн сайн тоглосон он жилүүдийг өнгөрүүлсэн юм.  1991 онд түүний цуснаас кокаин илэрсэн учир түүний тоглох эрхийг 15 сараар хассан байна.

 Сүүлийн жилүүдэд (1995-1997)  тэрээр аргентины “Бока Хуниорс” клубт тоглож, 29 тэмцээнд оролцон, 7 гоол оруулжээ. Диего “Ривер Плейта” багийн эсрэг тоглосон 1997 оны аравдугаар сарын 25-ныг түүний тоглосон сүүлчийн тэмцээний албан ёсны огноонд тооцох болсон юм.  Аравдугаар сарын 30-нд 37 настайдаа Марадона хөлбөмбөгийг орхиж буйгаа зарлажээ.

  Марадона хөлбөмбөгийг орхисны дараа спортын тайлбарлагчаар ажиллаж, олон нэвтрүүлэгт шинжээчээр оролцож байв. 2008 оноос 2010 онд тэрээр Аргентины үндэсний багийн ерөнхий дасгалжуулагч байсан юм.

Б.Атар