"Байерн"-ийн дараалсан хожил үргэлжилсээр

       Европын хөлбөмбөгийн холбооны хамгийн нэр хүндтэй тэмцээн болох Аваргуудын лигийн 2020-2021 оны улирал эхэллээ. "А" хэсгийн эхний тойрогт Германы "Байерн" Испанийн "Атлетико"-г талбайдаа 4:0-ээр "бут ниргэжээ". Тоглолтын гол баатраар 24 настай франц залуу К.Коман тодорсон бөгөөд тэрээр 28 болон 72 дахь минутад гоолдсон аж. Мөн 26 настай франц залуу К.Толиссо 66, 25 настай герман залуу Л.Горецка 41 дэх минутад өрсөлдөгчийнхөө хаалгыг мялаасан байна. Ийнхүү мюнхенчүүдийн дараалсан хожил 12-т хүрэх нь тэр. Аваргаа хамгаалах зорилготой "байерн"-чүүд 1974-76, 2001, 2013, 2020 онд Аваргуудын лигд түрүүлсэн билээ.