Монголын хөлбөмбөгийн холбооны их хурлаар дэд ерөнхийлөгчөө сонгоно

Монголын хөлбөмбөгийн холбооны их хурал ирэх аравдугаар сарын 7-нд болно. Уг хурлаар дэд ерөнхийлөгчөө сонгох асуудал хамгийн гол ажил болох юм. Учир нь тус холбооны дэд ерөнхийлөгчөөр ажиллаж байсан Г.Дашням (МТ группийн гүйцэтгэх захирал, “Улаанбаатар Сити” клубийн эзэн) албан тушаалаасаа өөрийн хүсэлтээр чөлөөлөгдөж байгаа тул дүрмийн дагуу дэд ерөнхийлөгчийн сонгуулийг тийнхүү хийх гэж байна.  

Сонгуулийн хороо нэр дэвшигчдийн материалыг шалгаж дууссанаар тэдний бүртгэлийг саяхан баталгаажуулжээ.

Сонгуулийн хорооны мэдэгдсэнээр МХБХ-ны дэд ерөнхийлөгчид энэ удаад ахмад хөлбөмбөгч, Үндэсний шигшээ багийн дасгалжуулагч асан Сандагдоржийн Эрдэнэбат, Санжмятавын Пүрэвсүх болон Моломжамцын Болд (“Сэлэнгэ пресс” багийн эзэн) нар өрсөлдөхөөр нэр дэвшиж байгаа аж.