Алтны үнэ сүүлийн зургаан жилийн хамгийн өндөр түвшинд хүрлээ

Дэлхийн эдийн засгийн өсөлтийн хурд саарч, АНУ болон БНХАУ-ын хооронд үүссэн худалдааны маргаан, дэлхийн томоохон орнуудын Төв банк мөнгөний бодлогоо зөөлрүүлэх хандлагатай, геополитикийн эрсдэлээс үүдсэн тодорхой бус байдал зэргээс шалтгаалан эрсдэл багатай хөрөнгө оруулалт руу хошуурч байна.

Ингэснээр алтны үнэ 2019 онд нийт 17 хувиар өсч, 1500 ам.доллар/унц-д хүрсэн нь сүүлийн 6 жилийн хамгийн өндөр үзүүлэлт юм.

Хүснэгт 1. Алтны үнэ, үнийн өсөлт /2019/

	Алтны үнэ	Үнийн өсөлт /QoQ/	Үнийн өсөлт /YoY/
2018Q4	1282	7.6%	-1.5%
2019Q1	1292	0.8%	-2.5%
2019Q2	1409	9.1%	12.5%
2019.07.31	1413	10.1%	15.4%
2019.08.29	1527	16.9%	27.1%

Эх үүсвэр: Блүүмберг

Үнэ сүүлийн хоёр сард огцом өсөхөд голлон нөлөөлсөн хүчин зүйлс болон онцлох үйл явдлыг дараах дүрслэлд харуулан, дэлгэрэнгүй байдлаар тайлбарлав.

• 2019/06/11

-АНУ Мексик Улсаас импортолдог бараа, бүтээгдэхүүнд 5%-ийн тариф ногдуулах шийдвэр 6-р сарын 10-наас хэрэгжиж эхлэхээр хүлээгдэж байсан ч АНУ-ын Ерөнхийлөгч тарифын арга хэмжээг цуцалснаа мэдээлж, зах зээлд эерэг хүлээлт үүссэнээр алтны эрэлт тодорхой хэмжээгээр буурсан.

• 2019/06/20

-АНУ-ын ХНБ-ны Холбооны нээлттэй захын зөвлөлийн 6-р сарын 18-19-нд болсон ээлжит хурлаар бодлогын хүүг 2.5%-д хэвээр үлдээх шийдвэр гаргасан. Мөн уг хурлаар нэгэн тодорхой дохиог өгсөн нь ХНБ бодлогын хүүгээ хамгийн багадаа 25 суурь нэгжээр бууруулахад нээлттэй буйг илэрхийлсэн юм. Үүний зэрэгцээ тус улсын инфляц 5-р сард жилийн дүнгээр 1.8%-тай гарч зорилтот түвшин 2%-д хүрээгүй, шинэ ажлын байрны тоо төсөөллөөс доогуур байгаа зэрэг нь эдийн засгийн идэвхжил саарч байгаагийн том дохио хэмээн шинжээчид үзэж байгаа бөгөөд бодлогын хүүг бууруулах нөхцөлийг бүрдүүлсэн дохио болов.

• 2019/06/25

-Иран Улс болон АНУ хоорондын харилцаа огцом муудаж, Ойрх Дорнодын аюулгүй байдал хүндэрсэн, Их британийн шинэ Ерөнхий сайд хэн болох нь тодорхой бус, Хонконг хотод эх газар луу хэрэгтэн шилжүүлэх хуулийг эсэргүүцсэн том хэмжээний бослого гараад байгаа зэрэг үйл явдлууд дэлхий дахинд геополитикийн эрсдэлийг нэмэгдүүлж алтны ханш огцом өслөө.

• 2019/07/01

-6-р сарын 28, 29-ний өдрүүдэд болсон “ИХ 20”-ийн уулзалтаар худалдааны маргаанд нааштай үйл явдлууд болж, сүүлийн саруудад уналттай байсан хөрөнгийн зах зээлд сэргэлт гарч эхлэв. Учир нь уулзалтын үеэр д.Трамп болон Ши Жинпин нар худалдааны маргааны талаар хэлэлцэн, хэлэлцээрийг дахин үргэлжлүүлэхээр болсон. Үүний хүрээнд анУ-ын зүгээс Huawei-д тавьсан хоригоо цуцлах, нэмж $325 тэрбумын бараанд тариф ногдуулахгүй байхаар тохиролцов. Хариуд нь бБНХАУ АНУ-аас импортлох хүнсний ногооны худалдааг дэмжихээ мэдэгдэв.

• 2019/07/18

-Иран Улсын дроныг АНУ-ын байлдааны хөлөг онгоц буудан унагааж, Иранд үүсээд буй нөхцөл байдал улам даамжирч газрын тосны нийлүүлэлт тасалдах эрсдэл үүссэн. ХНБ бодлогын хүүг 7 дугаар сарын эцсийн хурлаар 50 хүртэл суурь нэгжээр бууруулах хүлээлттэй байсан. Улмаар АНУ-ын мөнгөний бодлого цаашид сулрах, ам.долларын ханш буух нөхцөл байдал үүсээд байлаа.

• 2019/07/31

-ХНБ 7-р сарын 30-31-ний өдрүүдэд болсон нээлттэй захын зөвлөлийн хурлаар бодлогын хүүгээ 25 суурь нэгжээр буурууллаа. Энэ нь 2008 оны их хямралаас хойш бодлогын хүүгээ буулгаж байгаа анхны тохиолдол юм. гэсэн хэдий ч цаашид мөнгөний зөөлөн бодлого үргэлжлэх талаар тодорхой чиглэл өгөөгүй нь мөнгөжсөн алтны үнэ буурахад нөлөөлөв.

• 2019/08/01

-Шанхай хотноо хоёр орны төлөөлөгчид худалдааны маргааны асуудлаар ээлжит уулзалтыг 7-р сарын 31-нд хийв. Уг уулзалтын дараагаар Трамп БНХАУ-аас импортлох 300 тэрбум ам.долларын бараанд нэмэлт 10%-ийн татварыг 9-р сарын 1-ний өдрөөс эхлэн ногдуулахаар болоод байна. Учир нь БНХАУ “ИХ 20”-ын уулзалтын үеэр АНУ-аас импортлох хөдөө аж ахуйн барааны худалдааг дэмжинэ гэсэн тохиролцоондоо хүрээгүй, мөн хэлэлцээрийн нөхцөлийг дахин хэлэлцэх хүсэлт тавьсны улмаас уг шийдвэрийг гаргах болсон хэмээн мэдэгдлээ.