Эрх баригч намын эргэн санах амлалтууд

2016 оны УИХ-ын ээлжит сонгуульд эрх баригч МАН ямар мөрийн хөтөлбөртэй орсон бэ. 2016 оны сонгуулийн дүнгээр 76 суудлын 65-ыг нь авч, илт олонхоороо дөрвөн жилийн хугацаанд төрийн эрхийг барьсан МАН-ын мөрийн хөтөлбөрийг эргэн сануулж байна. 

2016 онд МАН "Бид хамтдаа чадна" уриатайгаар сонгуульд оролцож байжээ. МАН-ын мөрийн хөтөлбөр нь:

• Бид хамтдаа иргэдээ ядуурлаас аварч
• Эдийн засгаа хямралаас гаргаж
• Эх орноо өрнөөс салгаж
• Төрийн дампуурлыг засаж
• Тэгш журамт баян хүчирхэг Монголоо цогцлоож чадна хэмээн эхэлдэг.

Таны амьдралын үе шат бүрт зориулсан бодлогыг бид хэрэгжүүлнэ хэмээн мөрийн хөтөлбөртөө тусгажээ. Үүнийг тодруулбал: 

ТАНЫ ХҮҮХДЭД ЗОРИУЛЖ: 

• Бид таны хүүхдийг төрөхөд цэцэрлэг, сургуульд ороход боловсрол, эрүүл мэндийн хамгийн чанартай үйлчилгээг үзүүлнэ.
• Бүх хүүхдийг цэцэрлэгт хамруулна.
• Бүх хүүхдэд “Хүүхдийн мөнгө”-ийг ялгаварлалгүй   олгоно.
• "Үндэсний тэтгэлэг"- ийг нийт оюутнуудад ялгаваргүй олгоно.
• Олимпийн төрлийн спортуудыг ЕБС-иудын хичээлийн хөтөлбөрт оруулна. 
• Сурагчдыг нийтийн тээврээр төлбөргүй зорчуулдаг болгоно.
• Малчны хүүхдэд 6-8 настайдаа сонголттойгоор сургуульд элсэх боломж олгоно.

ТАНЫ ГЭР БҮЛД ЗОРИУЛЖ: 

• Гэр бүлийн үнэт зүйлсийг бэхжүүлж, гэр бүл салалт, хүчирхийллийг бууруулна. 
• Өрх толгойлсон эцэг, эх, орлого багатай өрх, хөгжлийн бэрхшээлтэй иргэдээ тусгайлан дэмжинэ. 
• "Цалинтай ээж" хөтөлбөр хэрэгжүүлнэ.
• Жирэмсний болон амаржсаны тэтгэмжийг цалингийн 75 хувиар биш, 100 хувиар тооцдог болгоно.
• Хүүхэд төрүүлэн өсгөх бүрт ээжүүдийн ажилласан жилийг 1.5 жилээр нэмэгдүүлэн тооцож, "Одонтой ээжүүд"-ийн тэтгэмжийг нэмэгдүүлнэ. 

ТАНЫГ АЖИЛ, ОРЛОГОТОЙ БАЙХАД ЗОРИУЛЖ:

• Өрийн дарамтыг бууруулж, эдийн засгаа сэргээн босгоно.
• Тусгай зөвшөөрлийн тоог гурав дахин цөөрүүлнэ. 
• Аймаг бүрт үйлдвэр байгуулна.
• Бид татвар нэмэхгүй.
• Эдийн засгийн хямралын өртгийг иргэдээр төлүүлэхгүй.
• Цалин, урамшууллыг өсгөж, өрхийн сарын дундаж орлогыг хоёр дахин нэмэгдүүлнэ.
• Хямралын үеийн хүү торгууль, зээлийн нөхцөлийг хөнгөвчлөх, хугацааг хойшлуулах, найдваргүй зээлдэгчийн жагсаалтаас хасч, төрөөс авч чадахгүй байгаа ажлын хөлсийг олгох арга хэмжээг авна.
• Бизнес дэх төрийн оролцоо, дарамт, шахалтыг багасгана.

ТАНЫГ АЯ ТУХТАЙ АМЬДРАХАД ЗОРИУЛЖ: 

• Нийслэл, аймгийн төвүүдийн хот байгуулалт, газар зохион байгуулалтын төлөвлөгөөг үе шаттай хэрэгжүүлнэ.
• Улаанбаатар хотын дүүрэг бүрт цэцэрлэгт хүрээлэн, хиймэл нуур, усан байгууламжуудыг барина.
• Автомашингүй гудамж байгуулна.
• Төв суурин газрын агаарын бохирдлыг бууруулахын тулд "Эко хот" хөтөлбөр хэрэгжүүлнэ.
• Бүх эмнэлгийн үзлэгийн цаг, дугаарыг гэрээсээ захиалдаг системтэй болгоно.

АХМАД ҮЕИЙНХЭНД ЗОРИУЛЖ: 

• Тэтгэврийн насыг нэмэхгүй, нийгмийн даатгалын шимтгэлийг өсгөхгүй. 
• Шударга халамжийн систем тогтооно. 
• Тэтгэвэр, тэтгэмжийг үе шаттай нэмнэ. 
• Ахмадуудаа тэтгэврийн зээлийн өрөнд оруулж байгаа бодлогыг өөрчилж, тэтгэврийн зээлийн хүүг 10 хувь болгон бууруулна. 
• Ахмадуудын мэдлэг, туршлагыг залуу үеийнхэнд өвлүүлэх зорилгоор "ахмад зөвлөх" ажиллуулж, "Ач санах" хуулийг батлан хэрэгжүүлнэ.
• Хүн амынхаа дундаж наслалтыг нэмэгдүүлнэ.
• Ахмад настанд зориулсан эмнэлгийн үйлчилгээ, асаргаа, сувилгааг өргөжүүлнэ.